Објавени се резултатите од обдукцијата на фуд-инфлуенсерот Мајкл Дуарте, кој почина на 8 ноември по судир со полицијата во Тексас. Дуарте, кој на социјалните мрежи беше познат под името Food With Bear Hands, имал 36 години. Токсиколошкиот наод покажал дека во моментот на смртта во неговиот организам немало алкохол ниту дрога, пишува Daily Mail, пренесува Index.hr.
Полициска интервенција
Полицијата на 8 ноември реагирала на повик до итната служба за „маж со нож кој се однесува неурачунливо“. Според Канцеларијата на шерифот на округот Медина, заменик-шерифот на местото на настанот го затекнал Дуарте како „се заканува дека ќе ги убие сите“ и „се обидува да нападне пожарникари и медицински лица од итната помош“.
Откако му биле издадени „повеќе усни наредби“ да легне на земја, Дуарте наводно „потрчал кон заменик-шерифот викајќи: ‘Ќе те убијам’“. Полицајката потоа испукала два куршума и го погодила. На Дуарте му била укажана помош на лице место, по што бил пренесен во болница, каде подоцна бил прогласен за мртов.
Наоди од обдукцијата
Обдукцијата покажала дека Дуарте имал две прострелни рани – една на левата страна од градите и друга веднаш под неа. Неколку недели претходно, Канцеларијата на судскиот медицински истражител на округот Бексар потврдила дека Дуарте „починал од прострелна рана“, а начинот на смртта официјално бил прогласен за убиство.
Кариера и семејство
Дуарте изгради голема заедница на следбеници на Инстаграм, ТикТок, Фејсбук и Јутјуб, каде со повеќе од два милиони обожаватели споделуваше видеа за готвење, совети за скара и рецепти. Своето хоби го претворил во бизнис за време на пандемијата. Зад себе ја остави сопругата Џесика и нивната шестгодишна ќерка Оукли. Непосредно пред неговата смрт, парот ја прославил деветгодишнината од бракот.
Објави на сопругата
Една недела по смртта на Дуарте, неговата сопруга Џесика се огласи на Инстаграм, признавајќи дека „се бори“ со загубата. Во објава со фотографии од Мајкл напиша дека не знаела како да се справи со неговата смрт, па решила да го прави она што ѝ изгледа правилно – да ги споделува неговите приказни, и како креатор на содржини и како сопруг, татко и пријател.
View this post on Instagram
Таа додаде дека планира да ја продолжи неговата оставштина и им се заблагодари на обожавателите за поддршката. Во подоцнежна порака директно му се обрати на Мајкл, истакнувајќи дека е горда што била негова сопруга и дека таа титула ќе ја носи со чест до крајот на животот.
Изрази на сочувство
Веста за смртта на Дуарте ја објави и неговата агенција за таленти Alooma Media Group, која во соопштение го опиша како „вистински и посветен партнер, сигурен соработник и, пред сè, извонредна личност“. Воедно беше покрената и GoFundMe кампања за покривање на трошоците за погребот и транспорт на телото во Калифорнија.
