Високиот прекршочен суд на Хрватска ја потврди правосилната казна од 15 дена затвор за српскиот адвокат Немања Бериќ, кој летото 2024 година беше осуден поради нарушување на јавниот ред и мир за величање на четничкото движење преку објави на социјалните мрежи.
Судот ја одби жалбата на Бериќ, со која тој тврдеше дека хрватските судови немаат надлежност да го осудат за содржини објавени на Фејсбук додека се наоѓал во Србија, како и дека му е повредено правото на слобода на изразување, пренесува Index.hr.
Апсење на граница и 31 спорна објава
Бериќ беше уапсен на 10 август 2024 година на граничниот премин Бајаково, при обид да се врати во Србија. Шибенско-книнската полиција против него поднесе прекршочна пријава за вкупно 31 објава на неговиот Фејсбук профил, поврзани со четничкото движење, националистички симболи и пораки што се поврзуваат со воени злосторства.
По апсењето беше спроведен пред Прекршочниот суд во Шибеник, каде што му беше изречена казна затвор од 15 дена, која веднаш ја издржа.
Поддршка од Вучиќ по враќањето во Србија
По излегувањето од затвор и враќањето во Србија, Бериќ беше примен од српскиот претседател Александар Вучиќ во претседателската резиденција. Вучиќ на социјалните мрежи објави фотографија од средбата и наведе дека Бериќ бил затворен поради пеење песна од Баја Мали Книнџа, најавувајќи и заедничко присуство на концерт на тој пејач, познат по антихрватски и антимуслимански песни.
Судот: слободата на изразување не опфаќа говор на омраза
Во образложението на пресудата, Високиот прекршочен суд нагласува дека слободата на мислење и изразување е темелно демократско право, но дека таа не е апсолутна и може да биде ограничена кога станува збор за говор на омраза, расизам и ксенофобија.
Според судот, објавите на Бериќ содржеле величање на четничкото движење и неговите претставници, како и симболи што изразуваат националистичка великосрпска идеологија, нетрпеливост кон несрпското население и негирање на жртвите од војните.
„Ја вознемири хрватската јавност“
Судот утврди дека Бериќ носел маици и капи со четнички симболи, позирал со подигнати три прста покрај таблата на влезот во Книн, објавувал пораки како „1995–2019 – Олуја е погром“, споделувал карти на т.н. Република Српска Краина и се фотографирал со симболи поврзани со осудени воени злосторници.
Овие постапки, според судот, претставуваат расистички израз што ја вознемирил хрватската јавност и ги негира темелните вредности заштитени со Европската конвенција за човекови права.
Нема докази за пристрасност на судијката
Во жалбата, Бериќ тврдеше и дека првостепената судијка била пристрасна, но Високиот прекршочен суд оцени дека за тоа не се понудени конкретни докази. Одлуката, според судот, се темели на утврдени факти, законска рамка и општопознати историски околности.
Хрватските судови се надлежни
Судот оцени дека хрватските судови се надлежни бидејќи дел од фотографиите биле направени на територија на Хрватска, а објавите на Фејсбук биле јавно достапни одреден период, иако Бериќ тврдеше дека профилот му бил затворен само за пријатели.
