На познатиот штипски угостител Стојанче Зарков, во јавноста познат како Грофот, денеска му е изречена казна доживотен затвор за кривичното дело „убиство“ на неговата 84-годишна мајка, Марија Заркова.
Пресудата ја донесе кривичниот судски совет, со кој претседаваше судијата Сашко Георгиев, во Основниот суд во Штип.
Зарков на последното судско рочиште даде исказ дека не се сеќава дали тој ја убил својата мајка или не. Пред судот изјави дека тој ден, на 8 август минатата година, ги извршувал секојдневните обврски, купил јадење и лекови за неговата мајка и излегол на кафе. Вечерта дома се вратил со такси возило.
Потоа вели дека бил во другата соба кога неговата мајка почнала да вика, а кога влегол кај неа забележал дека од вратот и тече крв. Повикал брза помош, а дошле и полиција и јавен обвинител.
Кога се јавил на бројот за итни случаи за да побара помош, Зарков се обратил со зборовите „ја прободев несакајќи мајка ми, или ќе преживее или нема“.
Пред судечкиот совет на 5 февруари изјави дека не се сеќава ниту на ова, туку дека го дознал откако ја слушнал снимката во Основниот суд. Потврди дека има проблеми со алкохолот и дека можеби требало да се лечи во институција, но додаде дека од разни причини не го направил тоа.
Зарков и на претходните судења истакна дека не се чувствува виновен за смртта на неговата мајка.
Настанот се случи на 8 август 2025 година, во семејната куќа на Заркови, нешто по полноќ.
