Претседателот на Сојуз на синдикатите на Македонија, Слободан Трендафилов, на денешната прес-конференција најави дека ССМ утре, 12 февруари, ќе ја продолжи втората фаза од синдикалните активности со блокада на Стопанската комора, Организацијата на работодавачи и Бизнис конфедерацијата.
Блокадата ќе започне во 12 часот на раскрсницата пред Стопанската комора. Според Трендафилов, на улица ќе излезат 21 претставник на синдикатот, колку што е законскиот минимум за организирање ваква активност.
„Повторно ќе бидеме 21 претставник – онолку колку што е потребно согласно законскиот минимум. Нема да дозволиме работниците да им мрзнат на газдите на улица, ниту на пратениците и Владата“, изјави Трендафилов.
Тој рече дека блокадата е насочена кон работодавачите кои, според него, со години одбиваат да ги зголемат платите, вклучително и минималната плата, иако истовремено се жалат дека квалификуваните работници ја напуштаат државата.
Пред Стопанската комора ќе блокираме газди кои ги блокираат работниците 36 години, газди кои одбија до крајот на минатата година да ги зголемат работничките плати, како и да ја зголемат минималната плата, а кукаат дека квалификуваните работници заминуваат од Македонија и дека не можат да ги задржат.
„Ќе блокираме газди кои се исплашија од нападите на Владата и нападите на политичките партии на работниците и на синдикатите, ќе блокираме газди се додека не донесат одлука за зголемување на минималната плата на најмалку 600 евра и за зголемување на сите останати плати за најмалку 6.000 денари. Утре, 21 од нас и од членовите на Органите и телата на Синдикатите здружени во ССМ, во 12 часот ќе бидеме пред Стопанската Комора. Ги повикувам работниците кои можат и кои ќе поминуваат да ни се придружат макар и на пет минути затоа што другите не бројат… тие не мислат и не сакаат да разберат дека овие блокади кои се таргетирани и наменски се со по 21 човек на улица само за да им покажеме дека не ни се потребни оние 12.000 луѓе кои излегоа на 28-ми Јануари со нас за време на Големиот работнички протест на ССМ, за да ги блокираме’, истакна Трендафилов.
ССМ бара зголемување на минималната плата на најмалку 600 евра и покачување на сите останати плати за најмалку 6.000 денари.
Трендафилов ги повика работниците да им се придружат, макар и симболично, а најави дека по завршување на таргетираните блокади ќе следува нов голем работнички протест, кој ќе се одржи во неработен ден и со организиран превоз од повеќе градови.
„Ќе дадеме шанса на сите работници да излезат на улица пред да го организираме генералниот штрајк во јавниот и приватниот сектор, доколку продолжи игнорантскиот однос“, порача претседателот на ССМ.
Ј. Ѓ.
