Почина американскиот актер Џејмс Ван Дер Бик, најпознат по улогата во серијата Dawson’s Creek. Имаше 48 години, а починал од последици од рак на дебелото црево во трет стадиум, кој му бил дијагностициран во август 2024 година.
Веста за неговата смрт на Инстаграм ја објави неговата сопруга, Кимберли Ван Дер Бик.
„Нашиот сакан Џејмс Дејвид Ван Дер Бик почина мирно утрово“, напиша таа. „Последните денови ги дочека храбро, со вера и достоинство. Засега ве молиме за приватност додека тагуваме за нашиот сакан сопруг, татко, син, брат и пријател.“
Дијагноза што го промени животот
Ван Дер Бик, кој со сопругата има шест деца – ќерките Оливија, Анабел, Емилија и Гвендолин и синовите Џошуа и Џеремаја – првпат јавно зборуваше за болеста во ноември 2024 година.
„Имам рак на дебелото црево“, изјави тогаш. „Се справувам со дијагнозата приватно и преземам чекори за да оздравам, со поддршка од моето неверојатно семејство.“
Болеста му била откриена по рутинска колоноскопија. Актерот призна дека пред прегледот не бил загрижен, иако наназад гледано имал симптоми.
„Стануваше збор само за промена во варењето. Мислев дека треба малку да ја прилагодам исхраната, можеби да престанам да пијам кафе. Кога состојбата не се подобри, решив да проверам“, раскажа тој во едно од последните интервјуа.
Кога се разбудил од анестезија, лекарот му соопштил дека станува збор за рак.
„Доживеав шок. Во тој момент животот целосно ми се промени“, рече актерот, додавајќи дека и покрај тоа што бил во одлична физичка форма, морал да се соочи со нова реалност.
Борба со болеста и поддршка од семејството
Тој често истакнуваше дека борбата со ракот е „работа со полно работно време“ – од медицински прегледи до административни процедури. Најтешко му било да им ја соопшти веста на најблиските.
„Јас сум човек кој се грижи за сите, татко и хранител. Да им кажам на децата и на семејството беше исклучително тешко“, призна Ван Дер Бик.
Сепак, поддршката што ја добил од семејството, пријателите и обожавателите му дала сила. Во декември 2024 година, во своето последно гостување во емисијата „Today“, изјави дека се чувствува подобро и дека верува оти искуството ќе му го промени животот на подобро.
„Ова патување бараше повеќе трпение, дисциплина и сила отколку што знаев дека поседувам. Но чувствувам благодарност“, рече тогаш.
Иако не можеше лично да присуствува на едно од повторните собирања на актерската екипа од „Dawson’s Creek“, преку видеопорака им се обрати на обожавателите, а неговото семејство доби стоечки овации.
Џејмс Ван Дер Бик зад себе остави сопруга и шест деца, како и генерација гледачи што го паметат како симбол на една телевизиска ера.
