Претседателот на Сојузот на синдикатите на Македонија (ССМ), Слободан Трендафилов, преку јавна објава упати остри критики кон власта, обвинувајќи дека наместо да работат на зголемување на работничките плати, функционерите се обидуваат да ги одбранат сопствените привилегии.
Во објавата, Трендафилов наведува дека комуникацијата на дел од функционерите предизвикала негативни реакции во јавноста.
„Дозволете ми на премиерите, на министрите, на пратениците да им се заблагодарам на ПИАР-от кој успеа на врхушката, на неколкумина во врвот, не само да им се смее пола држава, туку успеа да ја предизвика и другата половина да ги осудува“, напиша Трендафилов.
Тој додава дека, според него, одредени изјави и постапки предизвикуваат поделби меѓу граѓаните.
„За жал, или не внимаваат што зборуваат или намерно го прават тоа и мислат дека само што не го свртеле народот против народот, само што не ги свртеле овие со минимална плата против овие со минимална плата“, наведува претседателот на ССМ.
Во објавата, Трендафилов ја критикува и реакцијата на функционерите во однос на иницијативите за намалување на нивните плати и зголемување на минималната плата.
„Но, што ти значи еден ден возење пешки на пратениците, без патни трошоци како да возат на керозин, што ти значи и Иницијативата и тие да дојдат на минималец, да ги намалат нивните плати, но затоа не бираат средства, за да не го изгубат тоа“, пишува тој.
Трендафилов оценува дека, според него, доколку постоела поголема решителност за подобрување на работничките примања, ситуацијата би била поинаква.
„Да беа вака жестоки за зголемување на минималната плата и за зголемување на работничките плати, како што се жестоки да го одбранат неодбранливото, денеска ќе беше друго, немаше да служат за потсмев и немаше да ги осудуваат“, наведува тој.
Во објавата, претседателот на ССМ истакнува дека синдикатот ќе продолжи да се бори за зголемување на платите и правата на работниците.
„Еве ние се бориме за зголемување на работничките плати, не затоа што нас ни треба, туку затоа што нив им треба, но, вие борејќи се против нас, се борите и против нив, затоа што нападот на синдикатот е напад на секој работник“, напиша Трендафилов.
Тој додава дека синдикатот нема намера да се повлече под притисок.
„Ние не ви се плашиме, а тие ви се смеат“, наведува Трендафилов.
Во објавата, тој порачува дека синдикалната борба е насочена кон подобрување на работничките услови, а не кон политички позиции.
„Ако има останато некој разумен таму, нека им каже дека не претендираме да бидеме функционери, политичари, јавни личности или што уште и да ги плаши, да зголемеа плати на работниците, да зголемеа минимална плата, ниту ќе се знаевме, ниту ќе не познаваа“, напиша претседателот на ССМ, Слободан Трендафилов.
Сојузот на синдикати на Македонија вчера ја реализираше втората од најавените три блокади барајќи зголемување на минималната плата на 600 евра и на сите останати плати за 6.000 денари. Пред Стопанската комора беше испратена порака до работодавачите да се согласат да ја зголемат минималната плата и сите останати плати и да ја задолжат Владата да ги субвенционира придонесите.
Третата фаза од блокадите е Владата, која ќе биде блокирана во вторник кога Владата одржува седница. Доколку ваквите активности на синдикатот не резултираат со позитивен исход, најавен е уште еден протест кој ќе биде организиран во неработен ден за да му се даде можност на секој работник кој сака да присуствува, како и организирање генерален штрајк.
Ј. Ѓ.
