Министерот за земјоделство, шумарство и водостопанство Цветан Трипуновски и директорот на Агенцијата за храна и ветеринарство Оливер Миланов денеска во просториите на Министерството одржаа средба со одгледувачи на овци, на која се разговараше за актуелната епидемиолошка состојба со болеста сипаници кај овците и козите во општина Липково, Кумановско, информираат од Министерството за земјоделство, шумарство и водостопанство.
На средбата беше нагласено дека за спречување на појава на нови жаришта на територијата на државата, неопходно е одгледувачите строго да се придржуваат кон пропишаните контролни и заштитни мерки донесени од Агенцијата за храна и ветеринарство. Посочено е дека движењето на животните мора да биде проследено со ветеринарно-здравствен сертификат издаден од надлежно ветеринарно друштво.
Надлежните апелираат сточарите веднаш да ги известат ветеринарните друштва и Агенцијата доколку забележат симптоми на болеста или нагли промени кај животните, вклучително и зголемена смртност.
Институциите веќе спроведуваат контролни и заштитни мерки во заштитна зона во радиус од три километри и во зона под надзор во радиус од десет километри околу одгледувалиштата каде што е потврдена болеста, со цел навремено информирање и спречување на понатамошно ширење.
Дополнително беше истакнато дека извозот на јагнешко месо, производи од јагнешко месо и производи од овчо млеко кои се подложени на пастеризација не е доведен во прашање. Движењето на животните од одгледувалиштата кон кланичните капацитети не е забрането, но во сила остануваат рестрикциите за движење на живи животни и за работа на добиточните пазари.
Во зависност од развојот на состојбата на терен, како што беше посочено, кон средината на наредниот месец се очекува да бидат донесени нови заштитни и контролни мерки за справување со болеста.
