Конфликтот меѓу САД, Израел и Иран влегува во десеттиот ден, додека нападите врз енергетска инфраструктура и нови ракетни и дронски удари ја продлабочуваат регионалната криза, објави Си-Ен-Ен.
Истовремено, економските последици веќе се чувствуваат глобално – цената на нафтата повторно ја надмина границата од 100 долари за барел, што се случува првпат од почетокот на руската инвазија врз Украина во 2022 година.
Моџтаба Хамнеи на чело на Иран
Иранските центри на моќ, вклучително и Револуционерната гарда, се собраа зад новиот врховен лидер Моџтаба Хамнеи, кој ја презеде функцијата по убиството на неговиот татко Али Хамнеи.
Според извештаите, Револуционерната гарда соопштила дека е подготвена „целосно да му се покорува и да ги жртвува своите животи“ за новиот лидер.
Американскиот претседател Доналд Трамп претходно изјави дека изборот на Моџтаба Хамнеи е „неприфатлив“, додека аналитичарите оценуваат дека тоа значи продолжување на тврдата политичка линија на неговиот татко.
Нафтата повторно над 100 долари
Ескалацијата на конфликтот предизвика силен потрес на глобалните пазари.
Цената на нафтата надмина 100 долари за барел, што ги засили стравувањата од нов бран инфлација.
Шефицата на Меѓународниот монетарен фонд предупреди дека владите треба да се подготват за „незамисливи сценарија“ доколку кризата продолжи.
Берзите во Азија забележаа пад, додека некои држави почнаа да воведуваат мерки за стабилизирање на цените на енергијата.
Јужна Кореја најави ограничување на цените на горивото – прва таква мерка во речиси 30 години.
Напади врз енергетски објекти
Ирански официјален претставник изјавил дека нападите на Израел врз складишта за гориво и енергетски објекти ја турнале војната во „нова фаза“.
Техеран предупреди дека може да возврати со напади врз енергетската инфраструктура низ регионот, што дополнително ги зголемува стравувањата за прекин на снабдувањето со нафта и гас.
Во Бахреин најмалку 32 лица се повредени во напад со ирански дрон врз станбена зона, а државната нафтена компанија соопшти дека дел од нејзините операции биле нарушени по пожар во индустриски комплекс.
Контроверзии по напад врз училиште
Американскиот министер за одбрана Пит Хегсет изјави дека САД сè уште го истражуваат нападот врз основно училиште во Иран.
Иранските државни медиуми тврдат дека во нападот загинале најмалку 168 деца.
Според видеоснимки што се појавиле во јавноста, американски воздушен напад бил насочен кон поморска база во близина на училиштето, што отвора можност училиштето да било погодено во близина на воена цел.
Евакуација на дипломати
Стејт департментот им нареди на дипломатите кои не се неопходни за работа да ја напуштат Саудиска Арабија.
Американската војска потврди дека еден војник починал од повредите здобиени во напад во таа земја минатата недела.
Кој ќе одлучи кога ќе заврши војната
Претседателот Доналд Трамп изјави дека заедно со Израел ќе одлучи кога конфликтот ќе заврши.
Според него, израелскиот премиер Бенјамин Нетанјаху ќе учествува во разговорите, но конечната одлука ќе ја има Вашингтон.
Министерот за одбрана Пит Хегсет додаде дека САД ќе ги постават „условите за капитулација“ на Иран, без да даде дополнителни детали.
