По неколкунеделно двоумење и дипломатски пораки, Европа почна конкретно да се спротивставува на политиката на Доналд Трамп во војната против Иран. Најновите потези на клучните држави покажуваат јасен пресврт: Шпанија го затвори својот воздушен простор за американските авиони вклучени во операциите, додека Италија одби да дозволи слетување на стратешки бомбардери.
Полска, пак, го одби барањето на САД да испрати системи Patriot на Блискиот Исток, додека Франција одби да им дозволи на американските и сојузничките авиони што превезуваат воена опрема за Израел да прелетаат преку нејзината територија.
Овие потези доаѓаат во моментот кога војната во Иран влегува во вториот месец, со растечки број жртви и сè поагресивна реторика од Вашингтон. Трамп истовремено зборува за можни преговори, но и се заканува со нови напади и преземање на иранските нафтени ресурси, пренесува Index.hr.
За разлика од претходните кризи, европските земји сега за првпат отворено блокираат конкретни воени потези на САД, повикувајќи се на меѓународното право и стравот од поширока дестабилизација. Со тоа сè појасно се наѕира длабокиот раскол меѓу Вашингтон и дел од Европа – и пораката дека овој пат нема само да ја следат американската линија.
Шпанија го забрани воздушниот простор
Шпанската влада вчера потврди дека одбила да им даде дозвола на Соединетите Американски Држави за користење на својот воздушен простор за летови поврзани со војната во Иран.
„Ставот на Шпанија им е познат на сите. Користењето на базите не е одобрено, а секако, ниту користењето на шпанскиот воздушен простор не е одобрено за акции поврзани со војната во Иран“, изјави министерката за одбрана Маргарита Роблес.
Американскиот државен секретар Марко Рубио ја критикуваше Шпанија, сугерирајќи дека Вашингтон би можел да го преиспита сојузот по конфликтот.
„Но, ако НАТО се занимава само со тоа да ја брани Европа ако биде нападната, а потоа ни го ускратува правото на стационирање кога ќе ни затреба, тоа не е баш добар аранжман. Тешко е да се остане ангажиран и да се каже дека ова е добро за Соединетите Држави. Значи, сето тоа ќе мора да се преиспита“, додаде Рубио, нагласувајќи дека НАТО „не може да биде еднонасочна улица“.
Полска одби да ги отстапи системите Патриот
Денеска беше објавено дека САД побарале од Полска една од своите батерии на противвоздушниот систем Patriot да ја префрли на Блискиот Исток, но полската влада го одби тој предлог, порачувајќи дека тоа оружје е клучно за одбрана на полското небо. Вашингтон предложи една полска батерија Patriot, заедно со припаѓачките проектили PAC-3 MSE кои се веќе испорачани и се во сопственост на полската војска, да биде испратена во регионот зафатен со конфликтот со Иран.
Министерот за национална одбрана Владислав Косињак-Камиш беше јасен. „Нашите батерии Patriot и нивното вооружување служат за заштита на полското небо и источното крило на НАТО. По тоа прашање ништо не се менува и не планираме никаде да ги преместуваме. Нашите сојузници добро знаат и разбираат колку се важни задачите што ги имаме овде. Безбедноста на Полска е апсолутен приоритет“, напиша тој на социјалната мрежа Х.
Во сличен тон се огласи и заменик-министерот Цезари Томчик. „Полските Патриоти остануваат во Полска. Тие имаат своја задача во земјата, а тоа е одбрана на Полска и источното крило на НАТО“, порача тој.
Италија го забрани слетувањето на бомбардерите
Италија одби да им даде дозвола на американските воени авиони да слетаат во воздушната база Сигонела на Сицилија на патот кон Блискиот Исток. Дневниот весник Corriere della Sera извести дека американските бомбардери требало да слетаат во базата на истокот на Сицилија пред да го продолжат летот кон Блискиот Исток.
Според пишувањето на весникот, дозволата е ускратена бидејќи Соединетите Држави не побарале официјално одобрение ниту се консултирале со италијанскиот воен врв, што е задолжително според договорите кои го регулираат користењето на американските воени капацитети во Италија.
Франција им забрани прелет на американските авиони за Израел
Франција, пак, им забрани прелет на американските авиони за Израел, што предизвика бес кај Доналд Трамп.
„Франција не им дозволи на авионите кои, натоварени со воена опрема, летаа за Израел да прелетаат преку француската територија. Франција беше МНОГУ НЕКОРИСНА во врска со ‘Иранскиот крвник’, кој беше успешно елиминиран! Соединетите Држави ќе го ЗАПОМНАТ тоа!!! Претседател ДЈТ“, стои во објавата на Трамп.
