Претседателот на Владата, Христијан Мицкоски, денеска испрати смирувачки пораки до граѓаните во однос на енергетската криза и цените на дериватите. Тој истакна дека државата рефлектира стабилност во време на големи глобални превирања и дека во моментов не се предвидува воведување на кризна состојба ниту покачување на цената на електричната енергија.
Мицкоски потенцираше дека Македонија е единствената земја во поширокото опкружување која во изминатиот период забележа намалување на цените на бензините.
„Јас можам да кажам дека единствената земја во регионот којашто оваа недела не ги покачи, односно ги намали цените на горивата, е Македонија. Безоловниот 95 и 98 октански е намален за 2,5 денари, а дизелот не се покачи,“ изјави премиерот.
Тој направи споредба со цените во соседството и Европа, посочувајќи дека додека кај нас цените се движат до 1,39 евра за литар, во Грција, Албанија и Србија тие одамна надминуваат 1,80 или 2 евра. Во однос на продолжувањето на мерката за намалено ДДВ, Мицкоски е дециден:
„Апсолутно доколку видиме дека ќе имаме зголемување на цените на безоловниот бензин и на дизелот, тогаш апсолутно дека ќе ја продолжиме таа мерка, сѐ додека трае кризната состојба… И ако повторно ескалира, имаме уште алатки на располагање, тука се, се разбира акцизите.“
Во делот на електроенергетскиот систем, премиерот информираше дека државните капацитети работат стабилно, а хидропотенцијалот е на завидно ниво, што овозможува и извоз на вишоци енергија.
„Акумулациите се на некаде отприлика над 40%, што за овој период од годината е најмалку двојно повеќе од некои минати времиња… Деновиве во одредени моменти од денот, ЕСМ дури продава на берзи и заработува отприлика од 100 до 150 илјади евра на ден. Нема да има поскапување на цената на електричната енергија за граѓаните,“ потврди Мицкоски.
Иако признава дека глобалните фактори се непредвидливи, премиерот уверува дека Владата будно ја следи состојбата на светските берзи и дека е подготвена за вонредни седници доколку има нагли промени на цената на суровата нафта.
„Да не создаваме паника, состојбата е под контрола за разлика од некои минати времиња кога паниката беше и неспособноста и криминалот и корупцијата, второ име на некои претходни Влади… Ние како Влада ќе реагираме проактивно, а не реактивно,“ заклучи тој.
Според неговите најави, тековната недела се очекува со внимание поради благото намалување на цената на нафтата од типот „Брент“, по што во текот на викендот ќе се носат одлуки за евентуални нови интервенции.
