Прашањето за евентуалното враќање на поранешниот премиер Никола Груевски повторно се актуелизираше во домашната јавност по политичките промени во Унгарија. Актуелниот премиер Христијан Мицкоски порача дека ставот на државата останува непроменет и дециден – доколку Груевски се појави во Македонија, тој веднаш ќе биде спроведен на издржување на затворската казна за која веќе постои правосилна судска пресуда.
Мицкоски нагласи дека одлуките поврзани со азилот и престојот на Груевски во Будимпешта се во надлежност на унгарските власти, потсетувајќи дека првичните барања за екстрадиција беа одбиени уште во 2019 година токму поради неговиот статус на азилант. Иако постојат правни процедури и право на жалба за секое лице со ваков статус, премиерот подвлече дека домашниот правосуден систем има јасен налог за негово приведување врз основа на судските одлуки.
– Од она со што сум запознаен е дека постои процедура доколку лицето има право на азил поради определени причини – рече Мицкоски и упати за повеќе детали до Министерството за правда.
– Јас немам никакви очекувања, но доколку Никола Груевски се појави во Македонија, тој има правосилна пресуда и веднаш по неговото појавување во државата, органите на редот ќе го обезбедат и ќе го упатат на издржување затворска казна, која е во согласност со правосилна одлука. Нормално, секое лице има право да ги користи институциите и своите права да поднесува потоа жалби. Но, ние како Влада имаме пред нас правосилна пресуда, со која лицето е упатено на издржување затворска казна, а дали ќе се врати и кога ќе се врати, немам такви очекувања – изјави Мицкоски.
Во однос на очекувањата за тоа дали и кога бегалецот би можел да биде екстрадиран по доаѓањето на новата власт во Унгарија, Мицкоски изјави дека нема конкретни предвидувања, упатувајќи ги подеталните прашања до Министерството за правда. Тој потенцираше дека фокусот на државата во моментов е насочен кон градење на односите со новиот унгарски премиер Петер Маѓар.
Честитајќи му ја изборната победа на Маѓар, Мицкоски изрази надеж дека новата унгарска администрација ќе продолжи да биде силен поддржувач на македонските евроинтеграции. Според него, проевропскиот курс на новата влада во Будимпешта е позитивен сигнал за целиот регион и за забрзување на патот кон полноправно членство во Европската Унија.
– Доколку ме прашувате дали очекувам промена на односите – не, апсолутно не очекувам – изјави денеска премиерот Мицкоски по настанот за одбележување на Денот на Царинската управа.
На денешната прес-конференција, претседателот на СДСМ, Венко Филипче, порача дека по промените во Унгарија веќе нема оправдувања и дека власта мора веднаш да побара екстрадиција на Никола Груевски.
Филипче бара министерот Филков од ЗНАМ да побара екстрадиција на Груевски
„Ја поздравувам јасната и недвосмислена порака на новиот унгарски премиер Петар Маѓар од вчерашната прес конференција. Новата унгарска власт повеќе нема да обезбедува засолниште на луѓето кои бегаат од правдата. Маѓар експлицитно наведе дека Унгарија ќе ги испорача оние кои се кријат на нејзина територија и директно го означи Никола Груевски како криминалец. Ова е конечен крај на ерата во која Будимпешта беше безбедно засолниште за сите осудени корумпирани криминалци“, истакна Филипче.
Тој посочи дека по ова, на потег е актуелната власт во Македонија, особено министерот за правда од ЗНАМ.
Ј. Ѓ.
