Новинарката Катерина Цаневска преку објава на социјалните мрежи, алармира за критичната состојба на Универзитетската клиника за онкологија, каде веќе два месеци пациентите се оставени без неопходната биолошка и имунотерапија. Според нејзините наводи, во моментов во здравствениот систем недостасуваат лековите „Palbociclib“, „Fulvestrant“ (Фазлодекс) и „Nivolumab“, кои се од витално значење за запирање на прогресијата на малигните заболувања.
Цаневска посочува дека за онколошките пациенти секој изгубен ден претставува директен ризик за напредување на туморот, додека семејствата се принудени панично да бараат алтернативи бидејќи „болеста не чека тендери и бирократски изговори“. Таа остро ја критикува досегашната реторика на надлежните, нагласувајќи дека онкологијата не е супермаркет во кој специфичните протоколи можат лесно да се заменат со „заменска терапија“ или празни статистички изјави.
Контрадикторни изјави на министерот за здравство
Во фокусот на реакцијата се и двете дијаметрално спротивни изјави на министерот за здравство дадени во рок од само две недели. Додека пред 15 дена министерот уверуваше дека „никој не е оставен без терапија“ и дека пациентите се третираат со соодветни замени, неговата најнова изјава сугерира сосема поинаква реалност.
Министерот денеска изјави дека во оваа фаза се разгледува „каков тип на архитектура ќе се направи“ за да се воведе систем со кој ќе се знае не само колкава е потребата, туку и каде завршуваат лековите во здравствениот систем. Цаневска ова го толкува како директно признание дека надлежните не знаат каде завршуваат лековите и дека системот е нефункционален.
Прашање на одговорност, а не на администрација
„Ова не е недоследност – тоа е признание дека системот не знае што прави“, пишува Цаневска, поставувајќи ги прашањата за тоа кој потфрлил и кој ќе сноси одговорност за загрозените животи. Според неа, во овој случај нема простор за политички спинови, бидејќи секој ден без терапија е директен удар врз шансите за преживување на пациентите.
Наместо бирократски формулации и броење денови до нови набавки, јавноста очекува одговори на прашањето колкумина од пациентите нема да ја дочекаат терапијата поради системската негрижа и неможноста на државата да обезбеди континуитет во лекувањето на најтешко болните граѓани.
