Фондацијата за интернет и општество „Метаморфозис“, трета година по ред, го објавува конкурсот за годишната награда „Илија Жупаноски“, наменет за поттикнување на борбата против дезинформациите во земјата. Конкурсот има за цел да ги награди најдобрите трудови и мултимедијални содржини кои придонесуваат кон јакнење на јавната свест и отпорноста кон лажните вести. Во рамките на овој повик ќе бидат доделени две годишни награди во две посебни категории.
Првата категорија е наменета за најдобар новинарски труд, односно стручен труд подготвен од граѓански организации и поединци, што вклучува комплексни проверки на факти, анализи, истражувачки стории и слични форми. Наградата за оваа категорија изнесува 2.000 евра во денарска противвредност. Втората категорија се однесува на едукативна мултимедијална содржина подготвена за млади од 18 до 28 години, каде на креативен и иновативен начин се употребени информациско-комуникациските технологии со цел едукација и јакнење на отпорноста од дезинформации. Наградата за оваа категорија изнесува 1.000 евра во денарска противвредност.
Услови за учество и критериуми за оценување
Право на учество имаат сите автори кои поединечно или групно создале и објавиле материјали во весник, на телевизија или на интернет-портали во периодот од 1 ноември 2025 година до 1 октомври 2026 година. Пријавените материјали ќе ги разгледува комисија составена од релевантни претставници на медиумската и јавната сфера, а предност ќе имаат трудовите што се однесуваат на дезинформации со висок капацитет за нанесување штети во општеството и кои засегаат широк јавен интерес.
Конкурсот е отворен до 1 октомври 2026 година, а пријавите треба да се поднесуваат на официјалната електронска адреса на фондацијата со соодветна назнака. Авторите со самото пријавување се согласуваат нивниот труд да биде реобјавен во посебен Зборник, кој ќе биде подготвен како електронско издание по завршувањето на конкурсот. На овој повик немаат право на учество вработените во „Метаморфозис“, како ни нивните надворешни соработници со материјали подготвени во рамките на проектите на фондацијата.
Награда во чест на Илија Жупаноски
Наградата го носи името на Илија Жупаноски, истакнат општествен активист за демократија и активен борец против дезинформациите и хибридните напади врз демократските системи. Жупаноски беше еден од основачите на концептот за дигитална отчетност и транспарентност кој придонесе македонската Влада да биде препознаена како лидер во регионот по проактивна транспарентност. Тој служеше како советник за дигитални комуникации во кабинетите на Претседателот на Владата во периодот од 2017 до 2023 година.
Покрај државничкиот ангажман, Жупаноски остави значајни постигнувања и на полето на младинскиот активизам како еден од основачите на македонската дебатна асоцијација и директор на Младинскиот образовен форум (МОФ). Неговиот придонес во економското образование за млади и приватниот сектор останува запаметен во јавноста по неговата ненадејна смрт во ноември 2023 година на 41-годишна возраст.
