Украински беспилотни летала во текот на ноќта на 22 април ја таргетираа руската општина Сизрањ и околниот регион, јавуваат руските медиумски канали на Телеграм. Силни експлозии првпат биле слушнати околу 3 часот по локално време, а на социјалните мрежи се појавија фотографии и видеа кои наводно покажуваат неколку оштетени станбени згради во градот поради пад на остатоци од дронови, пренесува Кијив Индипендент.
Регионалното обвинителство тврди дека 11 лица, меѓу кои и две деца, се повредени како резултат на уривање на еден од влезовите на зградите. Иако градот е дом на нафтената рафинерија Сизрањ, засега нема информации за директни удари врз тој објект, а намерата на самиот напад останува нејасна. Кијив Индипендент нагласува дека не може веднаш да ги потврди извештаите ниту тврдењата на руските власти, додека украинската војска сè уште не се огласила со коментар.
Овој напад доаѓа во време кога Кијив ги засилува ударите врз руската нафтена инфраструктура во обид да го намали најважниот извор на приходи на Кремљ. Само еден ден претходно, на 21 април, украинските сили ја погодија станицата за дистрибуција на нафта во Самара, која е клучен објект за транспортната мрежа на земјата.
Самарската област, која се наоѓа на приближно 750 километри од украинско-руската граница, стана редовна цел на напади длабоко во руската територија. Украина редовно го таргетира рускиот воено-индустриски комплекс со цел да ја онеспособи воената машинерија на Москва и да го ограничи нејзиниот капацитет за понатамошни офанзивни дејствија.
