Владата подготвува сериозно и достоинствено одбележување на 35-годишнината од независноста на државата, во чии рамки ќе се одржи концерт на светски познатиот шпански тенор Хозе Карерас, заедно со еминентни македонски музички имиња. Ова денеска го соопшти владината портпаролка Марија Митева.
Митева истакна дека по првичните најави за централната прослава на 8 септември, Владата сега ја открива и следната голема иницијатива во која е вклучена интернационалната музичка ѕвезда, но и домашни уметници кои таа ги нарече „македонски ол-старс“ (all-stars).
„Ценам дека со ваквиот начин на одбележување на независноста, како Влада покажуваме дека навистина ни е важно, дека навистина сакаме граѓаните да уживаат и достоинствено, заедно со музичките великани, да покажеме дека Македонија има капацитет да организира настани за меѓународни ѕвезди, заедно со нашите најголеми ѕвезди“, изјави портпаролката Митева.
Таа додаде дека сите технички и организациски детали околу концертот веќе биле соодветно презентирани од страна на организаторите и самите учесници во проектот.
Според најавите на портпаролката, Владата планира етапно да ги објавува содржините од празничната програма во периодот што следи. Митева порача јавноста да очекува уште многу нови изненадувања кои ќе вклучат голем број македонски уметници во чест на јубилејот од независноста.
