пишува: ПЕТРИТ САРАЧИНИ
Најточниот одговор на ова ќе го даде секако пописот за неколку месеци драги мои.
Сепак, и денес, не само од собраниската говорница, туку со децении, од разно разни политички радикали и дилајли во земјава, се шират ирационални и нелогични дезинформации – дека се увезуваат Косовари (во 90тите беа 150.000, сега се 70.000), дека Албанците се под 16%, дека на „вистински“ попис (читај: без Албанци блиску до попишувачкиот процес) ќе падне Рамковниот договор и „преголемите“ права што „им се дадени“ на Албанците во Македонија…
Овие овие тези на подрумската националистичка пропаганда заслужуваат еден логичен и аргументиран одговор. Да остане запишано, да не биде дека не било кажано.
Имено, на последниот „вистински“ попис во 1991 (кој го бојкотираа Албанците и во и вон институциите), процентот на Албанците во вкупното население изнесувал 21.73 %.
Значи, веќе пред 30 години, Албанците во Македонија, кога ги попишувал друг и не учествувале самите во процесот, биле над 20%!
Е сега, Младиќот би сакал да ги праша неинформираните националшовинисти, неколку логични прашања, адаптирани на „јазикот на народот“ кој најдобро го владеат, за да не се збунат при одговарање:
Албанците веќе биле над 20% на пописот во 1991, пред 30 години, кој го бојкотирале. Колку ли се сега?
Колку ли се Албанците во Македонија, ако на тоа им ги додадете „150.000 Косовари“ во 90тите, или 70.000 Косовари денес, да не испаднат мнозинство? Еве прашајте го левото Димче, кое денес зборува за „увоз“ на население. Утре ќе зборува за „извоз“. Увоз-извоз левичар, како Слобо или Ранковиќ.
Туку, нели овие Албанците „се котат ко зајци“?! Пa нели Киро и Љубчо во 90-тите плашеа народ дека ако продолжи вака со природниот прираст, во 2030-та Албанците ќе биле мнозинство?
Ако на бројкиве погоре го додадете и наталитетот, до каде ќе стигнеме, а? 2030 не е сега толку далеку, само 10 години? Само чудно сега, „Шиптарите се котат…“, ама бројот се намалува ?!
Последно но не и најневажно прашање: Зошто јавноста, статистичарите, интелектуалците, политичарите, медиумите и новинарите -дозволуваат вакви лаги и хушкање? Зошто дозволуваат да поминат како вистини вакви манипулации со кои се поттикнува национална нетрпеливост во земјата? Пак ли се спремни за ситен политички ќар да прават големи бељи, да нé втурнат во омраза и насилство?
Очигледно, какви и да бидат резултатите на пописот што го очекуваме толку години, лудилото нема да запре. Подгответе се лудаците да нé бројат и пребројуваат и по пописот. А сите ние, достоинствено да го трпиме лудилото.
#SledeTene
#Popis2021
#LevaRukaDesniDzep
#AluminiumOverMaximum
Сите права се задржани. Текстот е личен став на Авторот.
