Судот во Лондон го одби барањето за кауција на основачот на Викиликс, Џулијан Асанж, кој се наоѓа во затвор, објави денеска Скај Њуз.
Одбивањето на кауцијата следува откако британскиот суд во понеделникот одби да го испорача Асанж во САД поради неговата психичка состојба, односно стравувањата дека може да изврши самоубиство доколку биде екстрадиран.
Асанж не е виден во јавност како слободен човек од 2012 година, кога побара засолниште во еквадорската амбасада во Лондон.
Еквадор му одобри политички азил, што предизвика дипломатски превирања во Велика Британија, иако по седум години стана непосакуван гостин и членовите на Скотланд јард влегоа во амбасадата и го уапсија.
Граѓаните на Лондон последен пат го видоа Асанж во април 2019 година, кога полицијата го спроведуваше. /МИА/
