Јавноста е сведок на оркестриран напад врз министерот за правда, Бојан Маричиќ, во време кога тој ги промовира и се обидува да ги спроведе реформите во судството. Очигледно во недостаток на вистинска аргументација на опозицијата, но и на вработени во судството и обвинителството кои се противници на реформите, се појавуваат лажни вести кои го оцрнуваат лично министерот и неговото семејство. Поттикнати од корумпирани структури во правосудството, опозиционерите ги имаат ставено во погон партиските портали да пласираат лаги против Маричиќ со цел да ги загрозат судските реформи. Поинаку не може да се сфатат лажните вести, ако се цени според тајмингот, но и според оцрнувачката содржина.
Очекувано е ваквите лажни напади да продолжат затоа што ќе се зголемува и интензитетот на реформите, што ќе значи ставање ред и дисциплина низ судовите и обвинителствата., нешто за кое стана јасно дека им пречи на одредени поединци, кои и понатаму имаат функција, но и релации со ВМРО ДПМНЕ, кои пак имаат свои медиуми за да може лагите да досегнат што пошироко. Канонадата започна кога „Република“ објави фотографија на таткото на министерот, инаку јавен обвинител во пензија, како е сликан покрај статуа од Хитлер, но не е фотографиран со гордост, како што дезинформира вмровскиот портал, туку напротив, во постот на фотографијата опоменува дека фашизмот не смее да ни се повтори. Но, слепилото на партиските медиуми ги спречила да прогледаат коректно и професионално, па си дале за право тие да наметнат толкување на фотографијата што е сосема погрешно.
Не помалку партизираниот, и исто така вброен во листата на медиуми финансирани со унгарски црни пари, порталот „Нетпрес“ се надоврза на лагите, па пласираше приказна дека таткото на министерот, обвинителот Момир Маричиќ, за да им заврши некаква работа на адвокати им побарал да му купат тепих. И на крајот, за целосно да заглават во сопствените лажни конструкции измислија дека министерот Маричиќ тргнал некои записници од сајтот на Министерството за правда кои се однесувале на Управниот суд, иако тие документи и понатаму се јавно достапни.
Значи, соочени со страв од реформите, со решителноста да се стави ред во правосудството и со можноста дека нивните кадри, кои ги избираа и ги унапредуваа според партиска заслуга и според тефтерче, а кои денес и понатаму им го штитат криминалот, може да останат без работа, а со тоа и тие да ги загубат позициите, одредени политичко – судски структури тргнаа решително да се спротивстават на реформите преку дискредитација на министерот. Нивните обиди се дезинформациите да ги наметнат како клучни во известувањето на јавноста, за да се минимизира продорот на реформите.
Но, ваквата провидна и штетна кампања нема да им донесе позитивен резултат, оти ако министерот се чувствува спремен за подвигот и ако има чисто досие, тогаш ништо не би требало да го премисли во намерата да се расчисти со криминално- коруптивните струји. Напротив, со ваквите обиди преку лажни вести да му се нападне реформата и филтрацијата на правосудството, може само да му се даде дополнителна храброст и одлучност, па можеби тоа ќе стави крај на немилосрдните, нечесните и партиско заслужните судии и обвинители. Координираните лажни вести може да се сметаат како своевидна потврда дека потезите на Владата во врска со судството ги погодуваат силно оние кои се соочени со пресуди за криминал и корупција, па во лажните вести гледаат некаков спас. Ако лажните вести против судските реформи добиваат на доминација, значи дека функционерите на ВМРО ДПМНЕ се поблиску до затвор, дека нивните партиски кадри во судството се подалеку од работното место, а дека реформите ја постигнуваат целта.
Впрочем, реформите во судството и неговата филтрација се наменети токму за таквите, за оние кои се спремни да ги лажат граѓаните само за да не успее проектот, за оние кои никогаш не би ги раскинале коруптивните врски, би ја ставиле партијата пред законот, а парите пред моралот. Сега ним најмалку им требаат реформи, најмалку им треба проверка на имоти и на предмети. Затоа им требаат лажни вести.
А, таквите вести и требаат и на опозицијата, затоа што таа е главен покровител на лажната пропаганда, од една страна има свои платеници во правосудството, од друга контролира медиуми. Ако и потсетиме како се однесуваше ВМРО ДПМНЕ кон Законот за јавно обвинителство и кон предметите на СЈО, тогаш јасно е кој вмешал прсти во уредувањето на лажните вести.
Д. Е.
