„Денеска и официјално започна процесот на имунизација против Ковид-19 во нашата земја. Првите вакцинирани се докторка и медицинска сестра дел од персоналот на Инфективната клиника, кои во изминатиов период секојдневно се бореа за секој еден човечки живот.“, истакна министерот Филипче на денешната прес-конференција за почетокот на имунизацијата и вакцинирањето на првите здравствени работници во државата.
Тој нагласи дека денеска продолжува вакцинацијата на сите вработени на инфективната клиника, потоа сите вработени во ковид центрите во Скопје, Болницата Осми септември, Институтот за белодробни заболувања Козле, Интерните клиники и сите кои работеа со ковид пациенти.
Филипче појасни дека за време на викендот ќе се вакцинираат здравствените работници од болниците од целата држава и приватните болници и дека се очекуваат и следните од вакцините.
„Следната недела ќе пристигнат и другите дози од вакцините на Фајзер. Тоа значи дека сите пријавени здравствени работници кои работат со ковид пациенти ќе бидат вакцинирани. Ќе започне и кампањата за подигање на света. Многу е битно граѓаните да се свесни дека вакцините се безбедни и дека безразлика од кој производител доаѓаат сите се развиваат на безбедни платформи.“, рече Филипче
Министерот потенцира дека ова е единствениот начин да ја смениме сликата на пандемијата и дека системот добро функционира.
„Ова е единствениот начин да ја смениме сликата на пандемијата. Системот добро функционира. Започнува со земање на анамнестички податоци, краток предлег и административна работа со внесување податоци за закажаниот термин и закажување на следниот термин за ревакцинацијата за после три недели. Дел од вакцините се чуваат и во фрижидерите на Модуларната болница. Можат да бидат до 5 дена во тие фрижидери на температура од 2 до 8 степени, после тоа се раствараат и во рок од 5 часа мора да се аплицираат.“, рече министерот за здравство Филипче на денешната прес-конференција.
Првите здравствени работници кои денеска ја примија вакцината против Ковид-19, се примариус доктор инфектолог Добринка Наунова Јовановска и главна сестра на Инфективна клиника Габриела Темелковска.
Ј. Ѓорѓиоски
