Андреас Шидер (Социјалдемократи, Австрија), Ирена Јовева (Обнова, Словенија) и Марион Валсман (Европската народна партија, Германија), кои се и потпретседатели на делегацијата, излегоа со заедничка изјава осудувајќи ја потпалувачката политичка кампања на својот колега, бугарскиот европратеник Ангел Џамбаски.
Изјавата ја пренесуваме во целост:
„Изразуваме длабока загриженост во врска со неодамнешното видео на европратеникот, во кое се изнесуваат територијални претензии кон Северна Македонија од страна на партија на Бугарската влада и се покажува отворено непочитување на европските вредности, само заради политичка кампања. Ова е спротивно на основните принципи на ЕУ и Договорот за добрососедски односи помеѓу двете земји.
Длабоко жалиме што видеото отворено изнесува непочитување кон напредокот и напорите што ги има направено Северна Македонија на нејзиниот пат кон ЕУ, кои се признаени од страна на Европскиот парламент, институциите на ЕУ и нејзините земји членки.
Европската унија има за цел поттикнување на мир, демократски вредности и благосостојба на граѓаните, надминување на историски разлики и работење заедно за заедничка иднина. Инсистираме дека Бугарија и Северна Македонија треба да продолжат во нивните напори кон добрососедски односи и треба да се избегнува и да се смета за неприфатлива секоја активност која го прекршува овој дух.
Оттука, ја повикуваме Бугарската влада, вклучувајќи го и Премиерот, да го осудат ова видео објавено од страна на нивниот владин партнер и што е можно појасно да се дистанцираат од каква било потпалувачка реторика заради добивање политички поени и поттикнување националистички идеологии. Потсетуваме дека политиката за проширување мора да биде водена од објективни критериуми, а не да биде попречувана од унилатерални интереси.
Ја повторуваме поддршката на Европскиот парламент кон стратешкиот избор на земјата за нејзина интеграција и ЕУ членство како крајна цел, врз основа на владеењето на правото, отворен демократски дијалог, мултиетничка хармонија и добрососедски односи. Повикуваме на брзо усвојување на преговарачката рамка, со цел избегнување понатамошни одлагања и одржување на првата Меѓувладина конференција што ќе ги отпочнат преговорите за време на Португалското претседателство со Советот, а со тоа признавајќи ги напорите на земјата во процесот на пристапување кон ЕУ“.
Превод: Н. Цветковска/ЦИВИЛ МЕДИА
