ЕУ на потег за целосна интеграција на Западен Балкан
Австрискиот канцелар, Себастијан Курц, на билатералната средба со премиерот Заев, испрати јасна порака и охрабрување дека Австрија е сериозен поддржувач на политиката за проширување и на македонските евроинтеграции. Иднината на Балканот е во Европа, а особено имајќи го предвид фактот дека европското семејство не може да биде целосно без интеграција на Западниот Балкан во него. Крајно време е да започнат претпристапните преговори со две од балканските земји, Северна Македонија и Албанија, а Унијата е на потег да го исполни дадениот збор.
Актуелизирање на решавање на статусот на МПЦ- ОА
Претседателот Стево Пендаровски во дипломатска мисија и лоби процес кај вселенскиот патријарх во Истанбул. Дел од посетата на Турција, Пендаровски ја искористи и за реотворање на прашањето околу македонската православна црква и нејзиното целосно признавање, а се очекува работната посета да доведе и до повторно актуализирање на дипломатските напори и ефекти околу решавањето на статусот на МПЦ – ОА.
Дипломатска офанзива
Македонскиот државен врв се впушти во целосна дипломатска офанзива во очи на претстојниот ЕУ самит. Релаксирањето на ковид-19 мерките и отворањето на светот, овозможија и зголемена надворешна активност и присутност на македонските владини претставници и претседателот. Од Софија, до Брисел и Виена, преку Словачка и Анталија, изминатата недела нашите министри, премиерот и шефот на државата беа прилично активни со обраќања на форуми, билатерални состаноци и официјални посети на држави.
Зелена листа на безбедни земји
Европската Унија ја консолидираше и ревидираше т.н. зелена листа на земји кои се сметаат за безбедни земји во однос на справувањето со ковид-19. Додавањето на Северна Македонија кон оваа листа, всушност значи дека македонските државјани повторно ќе може да патуваат туристички во земјите членки, односно се дозволија несуштинските патувања помеѓу нашата и државите на ЕУ. Останува уште практичната имплементација на ова решение од страна на секоја поединечна членка, а некои од нив, како Германија, на пример и официјално известија за кренатите рампи за нашите граѓани.
СДСМ во водство
Анкетата на ИРИ, презентирана неделава, обелодени водство на владејачкиот СДСМ во однос на најголемата опозициска партија, ВМРО-ДПМНЕ, во пресрет на најавените избори за градоначалници и советници. Претстојните локални избори, кои ќе се одржат во октомври, всушност претставуваат можност за преиспитување на расположението на електоратот и можност за верификување и потврдување на (не)успешните локални политики на општинските избраници од 2017 година. Скопје, Куманово, Охрид, Штип – ова се само некои од поголемите градови во кои, согласно, измереното јавно мислење, Социјалдемократскиот сојуз е несомнен фаворит во однос на октомвриското изборно изјаснување на граѓаните.
Продолжена важност на истечените пасоши
Во пресрет на летната туристичка сезона и отворени гранични премини, Министерството за внатрешни работи информираше дека патните исправи на граѓаните чија важност истекува по 31 јули 2021, ќе бидат продолжени со важност до крајот на тековната година – 31 декември 2021 година. Со оваа мерка, ресорното министерство се обидува да им излезе во пресрет на оние граѓани чии пасоши набрзо истекуваат, а поради сплетот на околности поврзани со пандемијата, истите не успеале навремено да ги обноват своите документи неопходни за патување.
Иван Дургутов
