Во период кога се очекува спроведување на предвремени парламентарни избори во Северна Македонија, се заостри реториката околу историскиот Договор со Грција со кој се реши долгогодишниот спор за името на нашата земја.
„Сериозна земја, која, нели, претендира да ги задоволи своите евроатлански и европски аспирации не треба да посегнува кон ревидирање на таков тип на договор, бидејќи не само што е билатерален, тој е и меѓународен договор, затоа што и трета страна, односно директно Европската Унија има свој влог“, смета Александар Јованоски од Хелсиншкиот комитет за човекови права.
Тој нотира дека не останавме имуни на она што се вика злоупотребување на она што беше склучено со Република Грција, особено односите меѓу двете соседни земји, за кои се постигнаа клучни договори за нормализација на односите и врз кој основ, а врз тие договори во моментот се завршува ратификацијата за прием на Република Северна Македонија во НАТО.
„Значи секоја ревизија или реотварање на овој Договор е тотално несериозен, мислам дека е на граница на невозможен, бидејќи таа ратификација која се случува во сите земји членки на НАТО е под новото уставно име Република Северна Македонија“, додава Јованоски, во изјава за Фронтлајн.мк.
„Ценам дека е сепак, политички трик, се злоупотребува за време на изборната кампања. Само да се потсетиме дека иста ваква реторика беше употребувана и во Република Грција, кога лани и кај нив се одржуваа изборите“, вели тој.
Јованоски смета дека ревидирање на Договорот со Грција би довело до разочарување кон сите партнери кои се составен дел од овој процес и поминале низ ратификација на протоколот за НАТО за влез на државата во Алијансата, но од друга страна укажува на несериозност и незрелост на политичките лидери кои посегаат на прашање кое е поздравено на меѓународно ниво како историско и клучно за нормализација на ситуацијата и во државата и во регионот и во поширокото соседство.
Билјана Богдановска
Камера: Атанас Петровски
