Претседателот на Институтот за медиумски анализи (ИМА), новинарот и активист Петрит Сарачини, објави реакција на навредите изнесени на социјалните мрежи против него. Ја пренесуваме неговата реакција во целост:
Божидар Божиновски, познат како Моџо Килингтон, во постови на неговиот влијателен ФБ профил, изрекува тешки навреди кон мене нарекувајќи ме „фашистичко гомно“, и ТЕШКА ЛАГА дека сум се јавувал во ТВ24 за да не го емитуваат! Овие лаги се проширија и на неколку портали, како Инфомакс, Експрес.мк и Доказ М.
Не сум се јавувал кај некого во ТВ24, мојот последен контакт со луѓе од оваа телевизија е пред повеќе од 4 месеци, на 2 јуни гостував кај Сеад Ризвановиќ во Студио 10. А за навредите од типот „фашистичко гомно“, што да речам, зборуваат сами за оној што ги изрекува и што ги шири.
Го повикувам јавно Божидар Божиновски, како и порталите Инфомакс, Експрес и Доказ М да се извинат за овие навреди и лаги и да го објават овој демант!
Го повикувам јавно уредништвото и менаџментот на Телевизија 24 да ја демантираат оваа лага која ги клевети и нив како цензори!
Го повикувам Здружението на новинарите на Македонија ЗНМ и Советот за етика во медиумите во Македонија СЕММ да им застанат на патот на овие јавни напади и хајки со лаги и тешки навреди!
И покрај овие напади кои траат со години и ми го нарушуваат личното и семејното достоинство и интегритет, досега не сум тужел никого! Ептен јак „цензор“ да сум ти бил!?
Ако на ова општество не му чинат луѓе како мене и молчи пред овие лажговци и дезинформатори, а им чинат и ги креваат во јавноста тие што со години неказнето шират вакви клевети, навреди и напаѓаат луѓе без никаква причина, нека е со здравје! Не се секирајте. Ќе ви текне, кога ќе тропнат и на ваша врата!
