За време на викендот на социјалните мрежи се прошири лажна вест дека ќе се крати породилното отсуство за мајките, што наиде на остра реакција кај дел од граѓаните. Ваквите наводи, кои се појавија кај проопозициски портали и апологети на социјалните мрежи брзо беа демантирани од страна на институциите, но сепак тоа не беше доволно за запирање на лавината коментари.
Во првичната лажна вест која што се прошири се истакнуваше дека породилното отсуство на мајката се крати од девет на пет месеци. Сепак, како што објасни и министерката за труд и социјална политика Јована Тренчевска, не се крати породилното отсуство на мајката, тоа останува девет месеци, но со новиот закон се воведува и родителско отсуство за татково во времетраење од четири месеци. Освен тоа, на 15 дена се зголемува и татковството отсуство, веднаш по раѓањето на детето.
„Мајката има пет месеци мајчинско и четири месеци родителско отсуство, значи останува со детето исто како и досега – девет месеци. Но, дополнително, тука се и 4 месеци на родителско отсуство на таткото, кои доколку се користат од страна на таткото по истекот на мајчинското и родителското отсуство на мајката, значи дека детето, наместо досегашните 9 месеци, ќе може да биде под родителска грижа вкупно 13 месеци“ потенцираше Тренчевска.
Демантот на оваа лажна вест сепак не беше доволен за да спласнат реакциите на социјалните мрежи и кај граѓаните. Создадената хистерија за лажното кратење на породилното отсуство потоа се прошири и на тоа зошто таткото требало да добива родителско отсуство.
Во обидот да се критикува, а фатени во лага, проопозициските апологети таргетот на гнев го свртеа во напад на овој нов закон и воведувањето на родителско отсуство за таткото, аргументирајќи дека таткото не треба да се грижи за децата и дека тоа е работа исклучиво на мајката.
Со ваквите ставови и дебати на виделина излегоа ставовите на дел од опозициските апологети дека улогата на жената во општеството ја гледаат само како мајка, додека мажот нема потреба да се грижи за децата.
Таквата поставеност на општеството е тоа што води кон нееднаквост на мажите и жените во општеството, но и на пазарот на труд, поради што жените добиваат споредна улога во општеството и стануваат зависни од мажите. Со проширувањето на татковството и воведување на четиримесечно родителско отсуство и за таткото се прави чекор кон изедначување на улогата на мајката и таткото во периодот на подигање на детето или децата и во општествените текови.
