Институциите започнаа да работат на расчистување на случајот по пријавата за сексуално вознемирување на 15-годишна ученичка со посебни потреби од страна на хигиеничар во училиштето кое го посетува.
Од прилепското обвинителство информираат дека започнале да прибираат потребни известувања, а денеска извршиле и распит, меѓу кои и на ученичката.
„Испрашани се директорката и социјален работник во училиштето. Поднесовме наредба до полицијата да ги прибави видеозаписите од училиштето. Психолог ќе вештачи за душевната состојба на ученичката за на крајот да решиме дали ќе се отвори предмет и дали ќе има кривично гонење“, информираат од прилепското обвинителство за МИА.
Сторијата прво ја објави телевизија „Клан“, од каде претходно известија дека хигиеничарот и ученичката одат во иста смена на училиште, снимките од камерите не се прегледани, а ниту осомничениот ниту девојчето не биле досега викнати во полициска станица.
Настанот наводно се случил на осми февруари, па оттаму е нејасно зошто толку долг период беше потребен за надлежните да бидат информирани и да започнат да постапуваат.
На 14 февруари во 10,40 часот во полициската станица во Прилеп од вработена во средно училиште било пријавено дека малолетна ученичка кај неа пријавила дека била допирана по телото од вработен од училиштето. Полициските службеници презеле мерки и активности и за случајот е известен јавен обвинител, информираат од СВР Битола.
Директорката на училиштето истакна дека ученичката била дете во ризик.
„Ги презедов сите потребни активности, беше направен разговор со родителите на ученичката, стручна служба, вработениот во училиштето. Поради тоа што добив различни изјави, настанот веднаш го пријавив во Центарот за социјални работи и во МВР. Ова дете е дете во ризик и затоа побарав од Центарот за социјална работа да се преземат нивни понатамошни активности“, истакна Тереза Златеска, директорка на СОУ „Орде Чопела“ Прилеп.
Сепак, ваквата изјава на директорката следува три недели откако наводно е извршено делото. Хигиеничарот во училиштето демантира дека тој е извршител на вакво дело. Тој не е експониран во јавноста, а на неговиот фејсбук профил изобилуваат фотографии од партиски активности во ВМРО-ДПМНЕ, а на дел од нив е и со партискиот лидер Христијан Мицкоски. Граѓаните бараат во расчистувањето на случајот воопшто да не влијае партиската припадност, особено што и новата директорка на училиштето е назначена од актуелниот градоначалник на Прилеп, од редовите на ВМРО-ДПМНЕ.
