Градоначалникот на Кисела Вода, Орце Ѓорѓиевски денеска до неколку медиуми испрати демант за пренесена вест, но и закана за тужба доколку не му се оствари желбата да се објави.
Се работи за информација на порталот 24 инфо, во која се тврди дека до Советот на општината поднел предлог точка со која бара измена на член од Одлуката за извешување на Буџетот на општина Кисела Вода, односно промена на коефициентот за исплата на плата на Градоначалникот да изнесува 3,4 а основицата на која се пресметува изнесува 26.755,00 денари.
Ова во суштина значи зголемување на платата на градоначалникот Ѓорѓиевски на над 90.000 денари или точно, 90.967 денари и тоа барање доаѓа лично од него.
Во крајно невистинит и тенденциозен текст се објавува целосна невистина, без притоа да се праша општина Кисела Вода за став. Во текстот се изнесени груби невистини во обид да се оцрни работата на градоначалникот Орце Ѓорѓиевски. Како општина која работи крајно транспарентно, должни сме да ја информираме јавноста за фактичката состојба, објавувајќи ја документацијата со која се докажува дека платата на градоначалникот не е зголемена, ниту пак имало обид за нејзино зголемување.
„Советот на Општина Кисела Вода, на 26. 12. 2022г., донесе одлука за извршување на Буџетот на Општина Кисела Вода за 2023 година и истата е доставена до Министерството за финансии, од каде единствената забелешка е дека текстот во една реченица треба да се замени со формулација која ја користи актуелното Министерство за финансии. Да се скрати текстот, бидејќи било предетално објаснето. ОНА ШТО Е НАЈВАЖНО ЗА ЈАВНОСТА, е дека во текстот за кој се бара промена и што Општината треба да го спроведе, воопшто не се работи за корекција ниту на коефициент, ни на основицата по која се пресметува платата. Платата е определена со член 17-в од Законот за плата на функционерите и други избрани и именувани лица во Републиката.
Познавачите на финансиските закони и нивното спроведување, новинарите кои се занимаваат со економија, знаат дека платата на градоначалникот е утврдена со овој Закон за исплата на плата на функционери и именувани лица и знаат како таа се пресметува. Основицата е законски утврдена, а коефициентот со кој се множи основицата, се пресметува според бројот на жители. Ниту се работи за какво било зголемување на платата на Градоначалникот, што многу лесно може да се разбере за тој што го познава законот“, се вели во демантот на Ѓорѓиевски додавајќи дека бараат да се објави во целост овој демант, да се повлече текстот и се бара извинување.
„Во спротивно, ќе преземеме правни мерки за заштита, а средствата од спорот ќе ги донираме“, се закануваат.
Слично како и неговиот шеф и ментор, Христијан Мицкоски, кој пред десетина дена се закани и испрати допис од неговиот адвокат до медиуми дека ќе тужи доколку не се повлечат информациите за неговиот наводен имот, кои, исто така, беа пренесени од албанскиот портал „Индекс“.
Дали ова е сликата која ги очекува медиумите а која наликува многу на едно време пред 2016-та година – закани и заплашувања кон медиумите за секоја информација која не одговараше на тогашното раководство на ВМРО-ДПМНЕ и Никола Груевски?
Новинарските здруженија за случајот со Мицкоски немаа реакција, се надеваме дека овојпат ќе реагираат на новите закани и тенденцијата која опозициската партија повторно ја враќа во своето делување кон медиумите.
