Протестот за случајот „Онкологија“ почна да се злоупотребува уште пред да се одржи, за на крај да се узурпира и радикално манипулира добрата волја на граѓаните и граѓанките што протестираа цивилизирано, вели за „Фронтлјан“ долгогодишниот новинар и политички аналитичар Ацо Кабранов.
– Злоупотребата на протестот почна на социјалните мрежи уште пред да се одржи тој. Видни членови на ВМРО-ДПМНЕ и на Левица го постираа на социјалните мрежи повикот за протест зачинети со нивните хускашки коментари. Разбирам дека работа на опозицијата е борба за власт и тоа е во ред, но не по секоја цена и за работа за која штотука почнала истрага за чиј исход и луѓето што правеле такви монструозни работи сите чекаме да ги слушнеме нивните имиња и одговорноста се разбира, вели Кабранов.
За недоличните и вулгарните пароли, Кабранов вика дека се под секое ниво и политичка култура.
– Од Апасиев ич не сум изненаден, што гордо носеше грда плаката. Впрочем јавноста и досега го видела неговото „културното однесување“. Професорската титула е едно, а воспитеноста е сосема друго, подвлече Кабранов.
Политикологот Благојче Атанасоски нагласи дека во изминатите триесет години на независност во македонската повеќепартиска историја,буквално секој граѓански автентичен протест беше узурпиран и злоупотребен од политичките партии за своја политичка цел – ќарување на ситни политички поени.
– Тоа ги угуши граѓанските протести. За еден од најголемите скандали во македонското здравство, најгрозоморен во историјата на Македонија во најмала рака е неумесно политичари и политички партии да го злоупотребуваат за својата политичка цел, за да дојдат на власт. Паролите со највулгарна и примитивна содржина, претставени од лидерот на нацифашистичката десноориентирана партија со лажно име „Левица“, не заслужуваат ни коментар, бидејќи се под секое цивилизациско ниво. За жал, одредена категорија на гласачи кај нас и тоа го сака и го бара, што е одраз и на политичката некултура на одредени наши сограѓани. Дотичниот лидер само свесно и наменски го злоупотребува гневот и бесот на граѓаните и на тој начин преку вакви „парол“, ја артикулира својата политичка амбиција. Уште посрамно е што самиот се фали дека младите биле негова најголема поддршка. Ако смета дека на тој начин треба да се артикулирааат политичките ставови на младите, тогаш се отвора работа и на психијатрите, изјави Атанасоски за „Фронтлајн“.
Политичкиот аналитичар и активист Џабир Дерала во својата денешна колумна пишува дека опозициските партии Левица и ВМРО ДПМНЕ ги киднапираа тагата и револтот на граѓанките и граѓаните од грозниот коруптивен скандал во Клиниката за Онкологија.
– Така, неофашистите (т.н. левица), заедно со својата постара политичка сестра (вмродпмне) покажаа крајна дрскост и вулгарност и за свои, евтини цели, целосно ги киднапираа тагата и револтот на граѓанките и граѓаните од грозниот коруптивен скандал во Клиниката за Онкологија. Бесчувствително. Крајно бесчувствително, споменатите политички партии се впуштија во разулавен говор на омраза, откако ја загадија јавната комуникација со агресивни манипулации и дезинформации, пишува Дерала.
Најмногу од сѐ, пишува тој во својот коментар, киднаперите на протестот ги понижија и си поиграа со емоциите на граѓанките и граѓаните чиј револт е оправдан.
Наводите за злоупотреба на терапијата за рак на Клиниката за онкологија предизвика низа реакции од сите страни. Надлежните уверуваат дека се прибираат докази и се истражуваат наводите за сторени кривични дела, а граѓаните и пациентите вчера излегоа на протест пред Влада и пред Јавното обвинителство, барајќи одговорност од последните тројца министери за здравство.
Дестан Јонузи
