„Наместо недоверба и конфронтации, Договорот од Преспа ни помогна во градењето мостови и зајакнување на врските. Договорот од Преспа, кој го реши долгогодишниот спор за името, делуваше како врска меѓу Северна Македонија и Грција. Тој не само што го расчисти патот за членство на Северна Македонија во НАТО и ЕУ, туку и поттикна атмосфера на добра волја и соработка“ рече вицепремиерот за европски прашања Бојан Маричиќ во интервју за грчкиот весник „То Понтики“.
Тој додаде дека Договорот од Преспа го трансформираше Балканскиот полуостров од регион кој генерира криза во регион на стабилност.
„Тој значително придонесува за регионалната стабилност и го отвора патот за мирен соживот во Југоисточна Европа. Оваа новооткриена стабилност привлече инвестиции, го подобри животниот стандард и донесе економски раст во регионот. Договорот од Преспа треба да се гледа како модел за успешна дипломатија и инспирација за решавање на билатералните прашања во регионот и пошироко“ рече Маричиќ.
Вицепремиерот додаде дека по Преспа, имаме широко отворена врата за културна размена и интеракции меѓу луѓето, дека се поттикна туризмот, при што граѓаните од двете нации го истражуваат богатото културно наследство и природните убавини.
„Економските врски исто така процветаа. Бизнисите од Северна Македонија и Грција склучија партнерства, поттикнувајќи ја трговијата и инвестициите. Заедничките вложувања создаваат можности за работа и поттикнуваат економски раст од двете страни на границата“ рече Маричиќ.
