Стотиците загинати во експлозијата во болницата во Газа предизвикаа гневни демонстрации низ Блискиот Исток, Хамас и Израел си ја префрлаат вината

Во голема експлозија што ја потресе болницата во градот Газа, преполна со ранети и други Палестинци кои бараа засолниште, загинаа најмалку 500 луѓе, соопшти Министерството за здравство на Хамас. Хамас обвини за израелски воздушен напад, додека израелската војска ја обвини ракетата погрешно истрелана од други палестински милитанти.

Додека гневот се шири низ регионот поради масакрот во болницата, а американскиот претседателот Џо Бајден се упати кон Блискиот Исток со надеж дека ќе го спречи ширењето на војната, министерот за надворешни работи на Јордан рече дека неговата земја го откажала регионалниот самит закажан за среда во Аман, каде Бајден требаше да се сретне со јорданскиот крал Абдула Втори, палестинскиот претседател Махмуд Абас и египетскиот претседател Абдел Фатах ел-Сиси, пренесува Асошиејтед Прес.

Војната меѓу Израел и Хамас „го турка регионот на работ“, изјави јорданскиот министер за надворешни работи Ајман Сафади за државната телевизија. Тој рече дека Јордан ќе биде домаќин на самитот само кога сите ќе се согласат дека неговата цел ќе биде „да се запре војната, да се почитува хуманоста на Палестинците и да се достави помошта што ја заслужуваат“.

Како реагираше светот?

Бајден кој изрази „најдлабоко сочувство за невините животи изгубени во експлозијата во болницата во Газа“ и сега ќе го посети само Израел, изјави претставник на Белата куќа.

Протести избувнаа избувнаа речиси низ велиот регион на Блискиот Исток, вклучително и во Јордан и на Западниот Брег окупиран од Израел, каде што палестинските протести се соочија со безбедносните сили на палестинската управа.

Откако Јордан го откажа планираниот самит во главниот град Аман со американскиот претседател Џо Бајден и арапските лидери, египетскиот претседател Абдел Фатах ел Сиси, кој исто така требаше да присуствува на самитот, рече дека го осудува „на најсилно можно израелско бомбардирање“ на болницата во Газа.

Саудиска Арабија, исто така, издаде цврста изјава, осудувајќи го со „најостро можен начин грозоморното злосторство извршено од израелските окупациски сили со бомбардирањето на Баптистичката болница Ал Ахли во Газа“.

Западните лидери пак, не го обвинија Израел за нападот, а францускиот претседател Емануел Макрон во објава на социјалните мрежи рече дека „ништо не може да го оправда нападот врз болница“ и додаде дека „сета светлина мора да се фрли на околностите“.

Експлозијата во болницата Ал Ахли остави страшни сцени. На видео за кое Асошиејтед прес потврди дека е од болницата се гледа како пожар ја зафатил зградата и теренот на болницата полн со расфрлани тела, меѓу кои и многу мали деца. Тревата околу нив беше покриена со расфрлани ќебиња, училишни ранци и други работи.

Крвопролевањето се одвиваше додека САД се обидуваа да го убедат Израел да дозволи испорака на материјали за очајните цивили, хуманитарните групи и болниците во малиот Појас Газа, кој е под целосна опсада по смртоносното дивеење на Хамас во јужен Израел минатата недела. Стотици илјади сè поочајни луѓе бараа леб и вода.

Хамас ја нарече експлозијата во болницата во вторникот „ужасен масакр“, велејќи дека е предизвикана од израелски напад.

А што вели Израел?

Израелските власти соопштија дека болницата била погодена од погрешна ракета истрелана од палестинскиот исламски џихад, кој дејствува во Појасот Газа.

Израелската војска го обвини Исламски џихад, помала, порадикална палестинска милитантна група која често соработува со Хамас. Војската соопшти дека милитантите на Исламскиот џихад истрелале низа ракети во близина на болницата и дека „разузнавачките информации од повеќе извори“ покажале дека групата е одговорна.

„Анализата на оперативните системи на ИД (Израелската армија) покажува дека канонада ракети била истрелана од терористите во Газа, минувајќи во непосредна близина на болницата Ал Ахли во Газа во моментот кога била погодена“, рече израелскиот премиер Бенјамин Нетанјаху во објава на социјалните мрежи.

„Разузнавањето од повеќе извори што ги имаме во наши раце укажува дека Исламски џихад е одговорен за неуспешното лансирање ракета што ја погоди болницата во Газа“.

Израелското разузнавање, кое ги следи сите терористички комуникации во Газа, објави аудио за кое тврди дека е од пресретнат разговор меѓу двајца оперативци на Хамас, во кое ои наводно признаваат дека болницата била погодена од „пријателски оган“.

Израелското министерство за надворешни работи објави видео емитувано на Ал Џезира кое, наводно, го документира моментот кога Исламскиот џихад лансираше неисправна ракета која и ја погоди болницата во Газа, убивајќи стотици.

ТВ каналот ја објави снимката во 18:59 часот по локално време. 20 минути подоцна, Палестинците почнаа да известуваат за повеќе жртви како резултат на ракета што ја погоди Арапската болница Ал Ахли, за која, како што објаснија подоцна од прес-службата на израелската армија, една од ракетите истрелани кон Израел паднала врз болницата.

На брифинг со новинарите, главниот армиски портпарол, контраадминистраторот Даниел Хагари, рече дека армијата утврдила дека во моментот на експлозијата немало воздушни, копнени или поморски напади во областа. Тој рече дека радарот во истиот момент детектирал појдовен ракетен истрел, а пресретнатата комуникација меѓу милитантните групи покажала дека Исламскиот џихад ги истрелал ракетите.

Хагари, исто така, сподели воздушни снимки собрани од воено беспилотно летало што покажува експлозија за која рече дека не е во согласност со израелското вооружување. Тој рече дека експлозијата се случила на паркингот на зградата и истакна дека бројот на жртвите не може да се потврди.

Според  Хагари, ракетите истрелани од ПИЈ поминале покрај болницата во моментот на нападот, кои, според него, го погодиле паркингот на објектот.

Тој рече дека војската имала операција на израелските воздухопловни сили во областа околу времето на експлозијата во болницата „но тоа беше со различен вид муниција што не одговара на снимките што ги имаме [од] болницата“.

Исламски џихад ги отфрла израелските тврдења, обвинувајќи го Израел 

ИЏ го отфрли израелското тврдење дека е одговорно за нападот. Исламскиот џихад ги отфрли овие тврдења, обвинувајќи го Израел дека „напорно се обидува да ја избегне одговорноста за бруталниот масакр што го извршил“.

„Ционистичкиот непријател напорно се обидува да ја избегне својата одговорност за бруталниот масакр што го изврши со бомбардирање на баптистичката арапска Национална болница во Газа преку неговото вообичаено измислување лаги и преку вперување на прстот на вината кон движењето Исламски џихад во Палестина. се вели во соопштението.

„Затоа потврдуваме дека обвинувањата изнесени од непријателот се лажни и неосновани“, се додава.

Групата укажа на наредбата на Израел да се евакуира Ал-Ахли и нејзиното претходно бомбардирање на болничкиот комплекс како доказ дека болницата била израелска цел. Исто така, се вели дека обемот на експлозијата, аголот на падот на бомбата и степенот на уништување, сето тоа укажува на Израел.

Имран Кан од Ал Џезира истакна дека некои набљудувачи ја доведуваат во прашање верзијата на Израел за настаните, а некои укажуваат на историјата на Израел за лажно припишување дејствија извршени од сопствените сили на вооружени палестински групи.

Масовни протести избувнаа во Либан, Јордан, Турција и на Западниот Брег

Либанскиот Хезболах, поддржан од Иран, повика на „ден на гневот“ кој ќе се совпадне со доаѓањето на американскиот претседател Џо Бајден во регионот.

По повикот на Хезболах, стотици демонстранти се пресметаа со либанските безбедносни сили пред американската амбасада во предградието Авкар, надвор од Бејрут, каде демонстрантите фрлаа камења и запалија блиска зграда, објави агенцијата Франс прес, пренесува Гардијан.

Полицијата употреби неколку парчиња солзавец за да ги растера демонстрантите, додека медицинските лица ги лекуваа луѓето погодени од солзавецот. АФП објави дека демонстрантите извикувале „смрт за Америка“ и „смрт за Израел“. Стотици, исто така, се собраа во француската амбасада во Бејрут, подигнувајќи знамиња на Хезболах и фрлајќи камења кои се натрупаа на главниот влез на амбасадата.

Во главниот град на Јордан, Аман, демонстрантите се обидоа да упаднат во израелската амбасада. Полицијата употреби солзавец за да растера неколку илјади демонстранти кои извикуваа слогани за поддршка на Хамас и бараа владата да ја затвори амбасадата и да го укине мировниот договор со Израел. Американскиот државен секретар Ентони Блинкен престојуваше во вторникот во градот, предводејќи ги американските дипломатски напори.

Во Техеран, стотици демонстранти се собраа пред британската и француската амбасада во раните утрински часови во средата. „Смрт за Франција и Англија“, извикуваа демонстрантите, фрлајќи јајца кон ѕидовите на комплексот на француската амбасада во иранскиот главен град.

Неколку илјади луѓе, исто така, се собраа на плоштадот Палестина во центарот на Техеран за да го изразат својот гнев, според АФП. Во Либија, стотици демонстранти од сите возрасти, мавтајќи со палестински знамиња и некои покривајќи ги лицата со палестински кефии, ги преминаа улиците на Триполи претходно собирајќи се на плоштадот на мачениците. Тие извикуваа слогани за поддршка за жителите на Газа.

Телевизиските снимки, исто така, покажаа протести во југозападниот јеменски град Таз, како и во мароканскиот главен град Рабат и главниот град на Ирак, Багдад.

Турскиот претседател Реџеп Таип Ердоган рече дека експлозијата во болницата во Газа е „последниот пример за израелски напади лишени од најосновните човечки вредности“, додека големи толпи демонстранти се собраа пред израелската амбасада во Анкара и конзулатот во Истанбул а друга голема толпа поддржувачи на Хамас се обиде да упадне во американската воена база во Куреџик, Турција.

Доцна во вторникот, судири со палестинските безбедносни сили избија во голем број градови на Западниот Брег, со кој управува Палестинската управа (ПА). Палестинските безбедносни сили во Рамала употребија солзавец и шок-бомби за да ги растераат демонстрантите кои фрлаа камења и скандираа против претседателот на ПА Махмуд Абас. Абас се враќаше на Западниот Брег откако го откажа планираниот состанок во Јордан со Бајден. Стотици демонстранти маршираа на централниот плоштад Манара во Рамала, а некои за поддршка на милитантните лидери на Хамас.

Судири со палестинските безбедносни сили, наводно, избувнале и во градовите Наблус, Тубас и Џенин на Западниот Брег, северен град кој беше во фокусот на големите израелски воени операции претходно оваа година.

Пред жртвите на ракетниот напад на болницата Ал-Али, во израелските напади врз Газа загинаа најмалку 2.778 луѓе, а беа ранети 9.700, според Министерството за здравство на Газа, а речиси две третини од убиените беа деца. Се верува дека уште 1.200 луѓе низ Газа се затрупани под урнатините, живи или мртви, соопштија здравствените власти.

Во нападот на Хамас на 7 октомври беа убиени повеќе од 1.400 луѓе во Израел, главно цивили кои беа убиени. Нападот, исто така, резултираше со одведување на околу 200 заробени во Газа. Оттогаш милитантите на Хамас во Газа лансираат ракети секој ден, насочени кон градови низ Израел.

Драган Мишев / Цивил Медиа