Лидерите на „Српската коалиција против насилство“ ја поздравија Резолуцијата на Европскиот парламент за изборите во Србија и изјавија дека признавањето на ситуацијата во земјата, особено „заробувањето на државата и медиумите од страна на Српската напредна странка“, покажува колку е важно да се зачуваат демократските принципи и владеењето на правото во Србија.
„Вашиот повик за независна меѓународна истрага … претставува значаен чекор кон решавање на системските прашања кои ги поткопуваат демократските процеси во Србија. Силно го поддржуваме продолжувањето на овие напори и го очекуваме одговорот на Европската комисија“, се вели во писмото на лидерот на коалицијата „Србија против насилството“ упатено до претседателката на Европскиот парламент, Роберта Мецолa, потпретседателите на Парламентот, лидери на политички групи и сите пратеници.
Тие додаваат дека од најголема важност е итно да се распореди ад хок мисијата за утврдување на фактите за изборите во Србија, чие формирање во таа резолуција го бара Парламентот на ЕУ.
„Ваквата мисија е клучна за собирање информации од прва рака и за обезбедување одговорност за секое прекршување на демократските норми, особено оние аспекти надвор од рамката на извештајот на ОБСЕ/ОДИХР, кои директно влијаеја на исходот од изборите за собранието на град Белград, како и парламентарни, покраински и делумно локални избори.” наведуваат во писмото.
Тие побараа од Европскиот парламент да продолжи да инсистира на исполнување на препораките на ОДИХР, особено оние поврзани со ревизијата на избирачкиот список пред одржување на идните избори.
Извор: МИА
