„Бугарската политика направи катастрофална грешка со Македонците и кон Македонија. За жал, нашиве „патриоти“, за да се дограбат до власта, се солидаризираа и ги поддржаа напорите на Бугарија“ рече претседателот Стево Пендаровски на граѓанскиот митинг во Прилеп.
Тој додаде дека мора да направиме се, по извборите, со новиот Парламент и новата влада се деблокира процесот на евроинтеграција, бидејќи сами нема да можеме да ја спречиме белата чума.
„Децата ќе може да останат тука, да просперираат, ако има услови за пристоен и достоинствен живот. Во овој момент, имаме направено голем исчекор од пред 5-10 години и во економијата, но со 650 евра просечна плата, објективно, можностите се лимитирани“ рече Пендаровски.
Претседателот додаде дека со пристап до европските фондови ќе се дуплира стандардот на секој македонски граѓанин, а тоа го кажуваат примерите на сите држави кои станале членки.
„Словенија во овој момент е една од две-трите држави која нема иселување, немаат потреба. Затоа што им е убаво со приходите, со инфраструктурата, со селата кои се поубави за живеење и од градовите. Ние можеме да сме како Словенија, но ни треба слога околу битните работи меѓу власта и опозицијата“ рече Пендаровски.
Убеден сум, рече Пендаровски, дека со слога и правилен избор во следните 4-5 години ќе станеме членка на ЕУ.
„Убеден сум дека ако имаме минимум слога меѓу нас, зборувам и за опозицијата, во следните четири-пет години ќе станеме членка на ЕУ и ќе ги заокружиме сите стратешки цели за кои сонувале генерации Македонци и граѓани на Македонија“ рече претседателот Стево Пендаровски на граѓанскиот митинг во Прилеп.
Тој додаде дека не е сигурен дека има добар соработник и соговорник од другата страна, мислејќи на опозицијата.
„Најголема мака ни е иселувањето. Болката ни е таа, децата и внуците одат надвор, бидејќи тука немаат шанса. Нема граѓанин кој не ме прашал како да го намалиме иселувањето. Најдобро е ако тоа го правиме здружени со другите побогати и поуспешни во Европа. Ако Македонија не стане членка на ЕУ, сами, со овие сили и капацитети и потенцијал, нема да можеме да го спречиме“ рече Пендаровски.
Претседателот додаде дека затоа е императивно, на досоинствен начин, како што направивме со НАТО, да влеземе и во ЕУ.
„Јазикот ни е гарантиран, идентитетот исто. Оваа структура по 17 години ги започна преговорите и ја отвори првата конференција со ЕУ. За жал, затоа што нашиве квазипатриоти имаа поинкави планови, од различни мотиви се усојузија со Бугарите“ рече Пендаровски.
