„Политичките партии се фатени помеѓу очекувањата на локалниот електорат кои се доста национални патриотски и тврди – и реалноста на меѓународната заедница која притиска за почитување на преспанскиот договор“, вели во изјава за „Фронтлајн“, Петар Арсовски – политички аналитичар и публицист, зборувајќи за интеграцијата на земјата во Европската унија и очекувањата од претстојната Влада на Христијан Мицкоски во однос на отворените прашања со соседните земји.
– Не мислам дека една политика може да го предвиди целото нивно однесување со текот на времето. Нивниот почеток е доста тврд по тоа прашање, но јас мислам дека со текот на времето ќе омекнува. Како што ќе се зголемува притисокот од меѓународната заедница, како што ќе се зголемува притисокот од неодржливоста на таа позиција, мислам дека ќе омекнува и ставот на Владејачките партии. Очекувам дека можеби не веднаш, но дека со текот на времето тие ќе почнат да го користат уставното име на државата и во т.н усмена комуникација која не е колоквијална, туку официјална. Во таа смисла, нивната надворешна политика по тоа прашање ќе е во луѓе. Мислам дека треба да се почекаат изборите за европски парламент, кои меѓу другото, ја вжештуваат атмосферата и во Грција и дека дури потоа ќе ја видиме вистинската позиција на двете влади по ова прашање, вели Арсовски за „Фронтлајн“.
Што се однесува до договорот со Бугарија, нашиот соговорник, е на мислење дека тој може да не дојде на ред.
– Уставните измени ќе мора да ја почекаат разрешницата на Преспанската, условно речено криза. Очигледно е дека ВМРО ДПМНЕ нема намера да ги донесе уставните измени во сегашниот пакет. Што и како може да се преговара ќе зависи и од политичкиот исход од новата политичка мапа во Бугарија, но и од тоа дали ќе биде тоа единствено прашање за решавање. Ако се собере повеќе од едно прашање може да се случи надворешните опоненти на нашата евроинтеграција да се зголемуваат – па да добиеме и заедничко вето, а тоа ќе стане тогаш по сериозен проблем, подвлече тој.
Дестан Јонузи
