Христијан Мицкоски конечно се сети дека е неопходно опозицијата конструктивно да се однесува во време на кризна ситуација, како актуелната со коронавирусот. Но зошто Мицкоски задоцни со предлозите, или пак му требаше време да смисли „револуционерна идеја“ да се прогласи кризна ситуација? А во меѓувреме, наспроти сите мерки за заштита од ширењето на коронавирусот што ги воведе Владата, тој организира јавен настан за претставување на својата кандидатска листа, изложувајќи ги сите присутни на сериозен ризик.
Се поставува прашањето, дали кризната ситуација, за која се освести Мицкоски, ќе му донесе олеснување ако заврши со одложување на изборите? Работава, само нека е криза, па макар и со коронавирусот…
ВМРО-ДПМНЕ со денови наназад повикува на одговорност кај власта, па дури и се заканува со кривични пријави, а како аргумент го користи наводното непреземање мерки за заштита од вирусот, односно дека власта задоцнила со мерките. Иако реалноста е дека, додека власта го мобилизираше системот, опозицијата критикуваше за состојбата, но постојано пукаше во празно.
На крајот, кога Мицкоски сфати дека системот функционира, излезе да предложи кризна состојба. Ако е неопходна таква одлука, тогаш во државата има кој да го сугерира тоа. Сигурно здравствените власти будно го следат трендот на ширење на вирусот и во даден момент проценуваат кои мерки да се преземат. Мицкоски ни оддалеку не е адресата на која треба да се потпре државата за да се справи со коронавирусот.
Впрочем, токму затоа Владата на неколку дена ја проширува листата со забрани. Почна од јавните собири, па со ограничување на работното време на локалите, па забрани гратис возење на старите во автобуси на ЈСП, а пред сѐ, ги затвори градинките и училиштата. Ако продолжи опасноста од коронавирусот во пошироки размери, сигурно дека експертите ќе предложат нови забрани, а може и да се прогласат некои подрачја за критични па таму да има поригорозни мерки.
Но, кога таквите предлози стигаат од Мицкоски, оној кој мака мачи како да профитира од коронавирусот и да создава лажна перцепција за ситуацијата, јавноста ги сфаќа несериозно, или со крајна намера дека во позадина постои обид за одложување на изборите.
Мицкоски со месеци наназад дава сѐ од себе да ги ескивира изборите, а пред граѓаните сака да покаже дека СДСМ бега од избори. Така беше и есента, така беше и периодов. Колку повеќе Мицкоски зборува дека власта бега од избори, толку власта прави сѐ да ги организира и да ги спроведе во најдобар ред.
Последното договорено помеѓу политичките партии беше дека изборната кампања ќе го смени текот и ќе се фокусира на електронските медиуми, социјалните мрежи и алтернативни методи во преставувањето на изборните програми, но дека за сега нема одложување на изборите. Впрочем тоа е и логично, затоа што има уште цел месец, па оттаму и потребата да не се брза со одлуки, оти никој не може да знае како ќе се развива ситуацијата со вирусот.
