Премиерот и лидер на ВМРО-ДПМНЕ, Христијан Мицкоски, призна дека се сретнал со лидерот на Демократската унија за интеграција (ДУИ), Али Ахмети.
– Да, се сретнав со господинот Али Ахмети. Го пренесов моето незадоволство со дел од ДУИ, тој ги спомна неговите забелешки и слично, изјави Мицкоски во синоќешното интервју за Алсат.
„Фронтлајн“ од партиски извори во ДУИ дознава дека средбата меѓу Мицкоски и Ахмети се одржала во Скопје на барање на премиерот Мицкоски.
Според истите извори, Ахмети на средбата го изразил своето незадоволство од, како што вели нашиот извор, институционалната деградација на Албанците и прегазувањето на легитимитетот на Албанците изразен со гласањето на последните парламентарни избори.
Ахмети на средбата говорел и за потребата од изгласување на закон со кој јасно ќе се дефинира која од албанските партии ќе ги претставува Албанците во Владата, а се разговарало и за уставните измени.
Од друга страна, Мицкоски, пак, го изразил своето незадоволство од политичките активности на некои експоненти на ДУИ.
Познавачите на политичките збиднувања во земјава средбата Мицкоски-Ахмети ја гледаат како приватна и во служба на наративите и политичките агенди на Ахмети и Мицкоски.
– Приватните средби меѓу политичари најчесто не се новост, а често се случуваат надвор од очите на јавноста. Во ова време кога владее голема тензија меѓу лидерите на ВМРО ДПМНЕ и ДУИ, се чини дека мотивите за објавување на ваква приватна средба се затоа што служат на наративите и агендите на г. Ахмети но и на г. Мицкоски. Објавувањето на ваква нејавна средба – служи за одржување на членството на ДУИ во „кондиција“, давајќи им надеж дека партијата наскоро може да се врати на власт. Ова е од суштинско значење за мобилизирање на базата на партијата, особено во период кога ДУИ е во опозиција, позиција во која не е навикната и во која нејзината база може да се деморализира бидејќи не е на власт, , изјави политичкиот аналитичар Бесим Небиу за „Фронтлајн“.
Според него, создавањето наратив каде ДУИ се смета за сè уште активна и релевантна на политичката сцена помага да се задржи мотивацијата на членовите и симпатизерите, нагласувајќи дека враќањето во владата е остварлива цел.
Поранешниот градоначалник на општина Желино и политички аналитичар Ќенан Алиу вели дека ваквите средби иако се нормални во политиката, треба да бидат потранспарентни за јавноста.
– Ваквите средби се нормални во политиката. Тој како премиер мора да кохабитира и со опозицијата за одредени прашања. Можно е да се сретнале не само еднаш туку двапати, па нели им требаше поддршка за законот за реструктуирање на владата и за измените на законот за локална самоуправа за да не се оди на предвремени избори во три општини. Можеби она што се разговара на овие средби треба да биде потранспарентно и подетално, но добро се вели дека во политиката има работи што се прават, а не се кажуваат и работи што се кажуваат и никогаш не се прават, изјави Алиу за „Фронтлајн“.
По победата на ВМРО ДПМНЕ на последните парламентарни избори, Мицкоски на прес-конференција изјави дека „време е ДУИ да одат во опозиција“. На граѓаните во предизборната кампања им вети дека ќе има и одговорност за функционерите на ДУИ.
Од друга страна, лидерот на ДУИ, Али Ахмети во текот на изборната кампањата на митинг од скопскиот плоѓтад и порача Мицкоски дека бил пораснат со гурабии и кекси и дека е уште е млад и устата млеко му вадела.
Дестан Јонузи
