Одвојувањето на Албанија од Македонија на пристапниот пат кон ЕУ, на подолг рок, може да создаде и меѓуетнички тензии, вели во изјава за „Фронтлајн“, Димитар Николовски – извршен директор на ЕВРОТИНК.
– Ова е огромен хендикеп за државата, затоа што е доказ дека заостануваме зад уште еден сосед со кого бевме во пакет. На подолг рок, ова може да создаде и меѓуетнички тензии, т.е. етничките Албанци да се чувствуваат како заложници на тврдоглавоста на ВМРО-ДПМНЕ. Од друга страна, меѓународниот углед на државата е нарушен, и западните држави се помалку ќе не гледаат како партнер на кого можат да се потпрат, вели Николовски.
Патот на Северна Македонија и на Албанија кон членството во ЕУ беше споен со почетокот на преговорите во летото 2022 годинa. Тогаш беа одржани и првите меѓувладини седница на Скопје и Тирана со Брисел, но отворањето на кластерите беше поместено за втората меѓувладина седница.
Претходно, во ноември 2020, Бугарија стави вето за преговарачката рамка за Северна Македонија со Европската Унија поради спор околу јазикот, историјата и бугарското малцинство.
Со посредство на европските партнери, беше пронајден компромис за преговарачката рамка на Северна Македонија која прифати во Преамбулата од Уставот, покрај веќе постоечките, да се додаде и бугарската заедница. Од друга страна, пак, се задржа чистата формулација за македонскиот јазик со тоа што Бугарија даде унилатерална изјава во која го изрази својот став за ова прашање.
По постигнатото решение, Северна Македонија на 19 јули 2022 година ја одржа Првата меѓувладина конференција со ЕУ во рамки на пристапниот процес. За да се одржи втората и да почнат да се отвораат поглавјата македонскиот парламент треба да изгласа уставни измени со кои Бугарите ќе ги вметне во Преамбулата.
Дестан Јонузи
