Шпанската фудбалска Ла Лига и сите прволигашки екипи ќе му помогнат на Црвениот крст во собирањето средства за помош на погодените од силните поплави во Шпанија во кои загинаа најмалку 158 луѓе, преку кампања за време на преносите на натпреварите викендов и преку нивните сметки на социјалните платформи.
„Шпанскиот професионален фудбал се придружува на сочувството и ја изразува својата солидарност со семејствата на жртвите и исчезнатите“, соопшти попладнево Ла Лига.
Претходно Реал Мадрид објави дека има намера да соработува со Црвениот крст и да донира еден милион евра.
Откако Шпанската фудбалска федерација одложи седум натпревари во Копа дел Реј претходно оваа недела, побара од организаторите да одржат едноминутно молчење во спомен на жртвите пред почетокот на натпреварите кои ќе се играат овој викенд.
Саботниот натпревар од Ла Лига помеѓу Валенсија и Реал Мадрид, како и пресметката на Виљареал со Рајо Ваљекано, се меѓу одложените натпревари бидејќи Валенсија го претвори својот стадион „Местаља‘ во центар за донирање храна и основни добра.
