Прогласувам вонредна состојба на целата територија на државата на 30 дена, заради заштита и справување од последиците од вирусот Ковид 19, рече Претседателот Пендаровски.
Предлогот на Владата за воведување вонредна состојба го соопшти и образложи премиерот Оливер Спасовски, по што беше доставен до претседателот на Собранието, Талат Џафери. Џафери, пак, го проследи до Пендаровски кој, како шеф на државата, има надлежности да прогласи вонредна состојба.
Претседателот рече дека од денес Извршната власт ќе може да носи уредби со законска сила, да воведе ограничувања на движењата на граѓаните ако тоа е потребно, да помогне и обезбеди средства за претпријатијата да се справат со економската криза и други одлуки.
Очекувам дека Владата ќе биде на висина на задачата во овој исклучително тежок момент, нагласи Пендаровски.
Претседателот рече дека сите партиски лидери и од позицијата и од опозицијата дадоа поддршка за прогласување на вонредна состојба.
„Владата ќе продолжи како техничка и сите политички партии ќе работат заеднички. Во ваква ситуација парламентарните избори ќе се одржат кога за тоа ќе се создадат услови. Апелирам, сите предизборни калкулации и подметнувања на партиите да се остават на страна, зашто во ваква ситуација се беспредметни.“, истакна претседателот Пендаровски
За македонските граѓани кои се надвор од нашата државата Пендаровски вели дека најпаметно е да останат во земјите каде што се, а доколу решат да се вратите се добредојдени, но и да знаат дека можно е да завршите и во карантин.
Ако си помагаме и ако се држиме заедно ќе ја пребродиме оваа тешка ситуација како и многупати до сега, во нашата историја, истакна претседателот Стево Пендаровски во обраќањето.
Ј. Ѓ.
