1492
Прочуениот италијански морепловец Кристофер Колумбо (1451-1506 г.), во служба на Шпанија, по двомесечно пловење, пристигна на бахамскиот остров Гуанахани, откривајќи ја на тој начин Америка. Колумбо на овој пат тргна со три бродови: „Санта Марија“, „Ниња“ и „Пинта“. Во текот на патувањето, ги откри Куба и Хаити, каде што остави дел од своите луѓе и се врати во Шпанија. Подоцна, уште неколкупати одел на слични патувања.
1518
Германскиот верски реформатор Мартин Лутер го одби барањето од римската курија да се покае и одрече од своите уверувања.
1811
Парагвај прогласи независност од Шпанија и Аргентина.
1822
Бразил доби независност. Дотогаш оваа земја беше португалска колонија.
1870
Почина американскиот војсководец, генералот Роберт Едвард Ли, командант на армијата на Северна Вирџинија во Граѓанската војна во САД од 1861 до 1865 година. Соочен со неспоредливо надмоќната армија на Северот, на 9 април 1865 година тој капитулира.
1934
Малолетниот Петар II Караѓорѓевиќ е прогласен за крал на Југославија, три дена откако неговиот татко Александар I Караѓорѓевиќ е убиен во Марсеј, во атентатот што го изврши македонскиот терорист Владо Черноземски.
1942
Во битката на пацифичкиот остров Гвадалканал во Втората светска војна Американците ги поразија Јапонците и го спречиле нивното навлегување во Австралија.
1960
Во Генералното собрание на Обединетите нации, во текот на дебатата за колонијализмот, советскиот лидер Никита Сергеевич Хрушчов го соблече чевелот и со него трескаше по масата.
1962
Во Сараево, СР Босна и Херцеговина е роден Бранко Црвенковски, поранешен премиер и претседател на Република Северна Македонија и долгогодишен лидер на СДСМ.
1968
По 190 години шпанска колонијална управа, африканската држава Екваторијална Гвинеја се здоби со независност.
1984
Во експлозија на бомба подметната од терористи на Ирската републиканска армија во „Гранд хотел“ во англискиот град Брајтон, каде се одржуваше годишната конференција на британските конзервативци, загинаа пет лица.
1990
Исламски терористи на мотоцикли во Каиро од заседа ги убија претседателот на египетскиот парламент Рифат Махџуба и тројцата негови телохранители.
1999
Генералот Первез Мушараф со воен удар ја собори владата на премиерот Наваз Шариф, го распушти Парламентот и воведе вонредна состојба.
2012
Европската унија стана добитник на Нобеловата награда за мир. Во образложението на Нобеловиот комитет се нагласува дека на ЕУ ѝ се доделува Нобеловата награда за мир за 2012 година, поради заслугите за обединувањето на европскиот континент. Одлуката за доделување на Нобеловата награда за мир на ЕУ е донесена едногласно од членовите на Комитетот, со кој претседавал генералниот секретар на Советот на Европа, Турбјорн Јагланд.
