Голем број студенти, средношколци и граѓани на Нови Сад попладнево се на новосадските булевари за да протестираат пред просториите на владејачката Српска напредна странка (СНС) откако синоќа беа нападнати неколку студенти, јави Бета.
Голем број студенти се упатија на протести што почнаа од универзитетскиот кампус со многу бучава, со свирежи, вувузели, труби и тапани.
Ним им се придружија земјоделците на трактори, како и голем број мотоциклисти, кои прават голема врева со своите мотори.
На протестот организирано доаѓаат и средношколци од Нови Сад, придружувани од голем број родители.
Редарите, претежно професори од Универзитетот во Нови Сад, формираа кордон пред просториите на СНС, за да спречат инциденти.
Демонстрантите носат транспаренти „Дијалог“ со илустрација на крвава бејзбол палка како алузија на тепањето студенти и претходниот повик на режимот за дијалог „Доста е крв“, „Сите за еден, еден за сите“, „Бојата ќе се измие, крвта не“ и скандираат „Уапсете го Вучиќ“.
Полицијата во Нови Сад приведе четворица осомничени дека синоќа нападнале студенти во центарот на Нови Сад.
Припадници на МВР во Нови Сад ги уапсија Д.Р.(22), Н.Б.(22) и Н.Д.(22) од овој град и С.К.(30) од Сремски Карловци, поради постоење основи на сомнение дека го сториле кривичното дело прекршок насилничко однесување и тешка телесна повреда, објави Блиц.
Се сомничи дека четворица од нив синоќа во Нови Сад физички нападнале двајца млади момчиња и три млади жени и дека, во таа прилика, една млада жена била тешко повредена, а еден млад маж полесно.
При нападот се повредени двајца студенти, од кои студентот од Филозофскиот факултет е пуштен на домашно лекување. Студентот А.В.(23) бил примен во Ургентниот центар со тешки телесни повреди и се уште е под надзор во здравствената установа.
Поврзано:
