Францускиот претседател Емануел Макрон рече дека Европа е сојузник на СAД и дека Америка доколку сака Европа да биде ангажирана во поголеми инвестиции, безбедност и одбрана, тоа не треба да им наштети на европските економии заканувајќи им се со царини.
„Моето прво прашање за САД е: Дали Европската унија е ваш проблем број еден? Не, не мислам така. Вашиот прв проблем е Кина. Второ, Европа ви е сојузник. Ако сакате Европа да биде ангажирана во поголеми инвестиции и безбедност и одбрана… не треба да им наштетувате на европските економии заканувајќи им се со царини“, рече францускиот претседател.
Трамп го критикуваше трговскиот дефицит на САД со Европската унија, кој се зголеми за 26,9 милијарди долари на 235,6 милијарди долари во 2024 година, според податоците на американската влада.
Францускиот министер за надворешни работи Жан-Ноел Баро изјави дека Европската унија ќе се спротивстави и соодветно ќе одговори на сите царини што и ги наметнаа САД.
– Нема двоумење кога станува збор за одбрана на нашите интереси, рече Баро во интервју за TF1.
Американскиот претседател Доналд Трамп вчера соопшти дека Вашингтон ќе се придвижи оваа недела да воведе царини од 25 отсто за производите од челик и алуминиум.
И германскиот канцелар Олаф Шолц рече дека Европа е подготвена да реагира „во рок од еден час“ доколку САД воведат царини за Европската унија.
На новинарско прашање дали ЕУ има „список на мерки“ со кои треба да одговори доколку САД воведат царини, Шолц одговори: „Да, ако треба да се изразам на највнимателен дипломатски начин. Ние како Европска Унија можеме да преземеме мерки во рок од еден час“.
