Управниот суд во Скопје ја усвои жалбата на Тина Иванова, поранешна директорка на Македонската филхармонија, која поранешната министерка за култура Бисера Костадиновска Стојчевска, како што пресуди судот, НЕПРАВИЛНО и НЕПРАВЕДНО ја разреши, поради наводни неправилности во нејзината работа. Тина Иванова ја тужеше министерка за култура Бисера Костадиновска Стојчевска за како што рече „јавно изнесени навреди и клевети“ на прес-конференција. Иванова од неа побара јавно да ѝ се извини или ќе мора тоа да ги бара на суд.
По сите истражувања, како што посочува Иванова, не се пронајдени никакви неправилности во нејзиното работење на позицијата Директор на Македонската Филхармонија.
Таа вели дека пресудата на скопскиот Управен суд за Министерството за култура раководено од поранешната министерка за култура Бисера Костадиновска Стојчевска е извршна и неотповиклива, oдносно, Министерството за култура и екс министерката немаат право на жалба.
Тина Иванова за време на мандатот како директорка на Филхармонија, ги поддржа протестите на уметниците и на целиот колектив на Македонската филхармонија и се потпиша на нивната петиција.
Тина Иванова по повод пресудата изјави:
„Тогашната министерка за култура, Бисера Костадиновска Стојчевска, злоупотребувајќи ја позицијата и моќта, којашто, за жал, толку често во историјата ги завела и измамила луѓето, искривувајќи им ја сликата за реалноста, без никаква основа, повторувам, без ниту една основа и пронајдена недоследност или неправилност во работењето, нешто, коешто сега веќе и институционално се докажа, но, она што има поголема тежина за мене, е тоа што и без трошка емпатија и човечност, се обиде да го осквернави моето достоинството и да стави дамка на моето име и презиме и на целото мое семејство. Со тој потег, потпирајќи се на позицијата, таа го впери прстот на јавноста кон мене. Но, и покрај тоа, оние коишто ме познаваа, сите мои сакани, сите мои искрени пријатели, сите луѓе коишто веруваа во мене, знаеја и тогаш дека е во прашање една голема небулоза и тенденциозна манипулација. Денес стојам пред сите нив и чесно и гордо им соопштувам дека мојата чесност и достоинственост денес и официјално победија. Јавно им се заблагодарувам за укажаната доверба и поддршка. Оваа победа ви ја посветувам вам!“, вели Тина Иванова.
