Одредбите од Законот за употреба на македонскиот јазик не може да се спроведуваат ад хок, без концепт. Тоа важи и за распишувањето на конкурсот за директор на Инспекторатот за примена на македонскииот стандарден јазик. Во комисиска расправа е измена на Законот за македонски јазик, се прави усогласување и додека се работи тоа не може да се постапува по конкурсот. Можеби сме побавни, но работиме темелно, прецизно, точно и нема да дозволиме да ни се случуваат скандали какви што имаше во минатото. Тоа го истакна министерот за култура и туризам Зоран Љутков како одговор на прашањето на пратеничката на СДСМ, Соња Лукаревска, која побара од министерот да одговори зошто девет месеци власта не постапува согласно одредбите од Законот за употреба на македонскиот јазик усвоен во Собранието во јануари минатата година.
– Инспекторатот за македонски јазик не е формиран затоа што направена е трансформација во Министерството за култура и туризам, поднесовме измени на законот вклучително и за Законот за македонски јазик. Во меѓувреме положија заклетва многу лектори. За да бидеме транспарентни, почекавме да им бидат врачени лиценците, и потоа да го распишеме конкурсот за директор на Инспекторатот по македонски јазик. Тоа е сторено во понеделникот, кога беше распишан конкурсот, рече Љутков.
Одговорајќи на прашањето на Лукаревска тој истакна дека за разлика од претходната власт предводена од СДСМ и ДУИ која, како што посочи, за седум години назначила шест министри за култура, актуелната власт е определена да работи со план.
– Конечно ние првпат од 2014 година имаме конкурс за поддршка на проекти од национален интерес во културата, резултати во кои нема скандал. Минимален број приговори по конкурсот, тоа е репер дека добро ја работиме работата. Сега кога кончено воспоставиме систем на ред, некаква минимална нормалност во работењето на Министерството, вие наоѓате забелешки дека девет месеци не сме работеле ништо, рече Љутков.
Што се однесува на забелешките за бавноста во спроведувањето на политиките во областа на културата, тој рече дека сите институции биле затекнати во девастирана состојба, нагласувајќи дека е потребно време да се воведе ред.
Лукаревска од собраниската говорница рече дека не е задоволна од одговорот на министерот, особено реагирајќи на оние делови кога тој рече дека ништо не било сторено за културата изминатите седум години кога власта ја предводеше СДСМ.
– Законот за употреба на македонски јазик беше донесен во јануари минатата година со политички консензус, во рамки на Владата на СДСМ. Ваше е наредниот период да почнете да го имплементирате, тоа е ваша обврска како министер за култура и туризам, потсети Лукаревска.
Поврзано:
