Потпретседателката на СДСМ, Кристина Костова, остро го критикуваше денешното излагање на министерката за финансии, Гордана Димитриеска-Кочоска, која, како што вели, се обидела да ја потценува пратеничката Славјанка Петровска. Според Костова, изјавата на Димитриеска-Кочоска претставува уште една потврда за родовата дискриминација која, како што посочува, ДПМНЕ ја практикува со цел да ги понижи жените, особено во политиката.
„Оваа изјава е пример на безобразна родова дискриминација. Во обид да избега од личната одговорност за сериозното влошување на животниот стандард на граѓаните, министерката за финансии ја отфрла критиката на Петровска и со потценувачки тон ѝ вели дека не знае колку троши четиричлено семејство,“ објави Костова на Фејсбук.
Потпретседателката на СДСМ, исто така, ја обвини Димитриеска-Кочоска за влез во патријархални и родово ограничувачки рамки, кои, како што вели, се целта на агресивното наметнување на традиционални улоги за жените од страна на ДПМНЕ.
„За жал, да се биде жена во политика не значи автоматски дека се работи на родова еднаквост. Иако таа се претставува како жена на важна политичка позиција, изјавата на Димитриеска-Кочоска е пример на женомразачка политика која ја интернализирала мизогинијата, основен постулат на ДПМНЕ,“ изјави Костова.
Костова посочи дека борбата за родова рамноправност подразбира напори за завршување на дискриминацијата против работните мајки, како и за изградба на систем што ќе им овозможи на жените флексибилност за баланс помеѓу професионалниот и семејниот живот.
„Ние мора да обезбедиме рамноправност во изборите што жените ги прават, било да се тоа избори за кариера, брак или семејство. Овој избор треба да биде почитуван, а системот треба да обезбеди финансиска стабилност за сите жени. Сепак, оваа Влада предводена од Мицкоски ја оневозможува финансиската стабилност за мнозинството граѓани,“ истакна Костова.
На крајот, Костова ја оцени изјавата на Димитриеска-Кочоска како срамна, но не и неочекувана, додавајќи дека оваа политика е карактеристична за ДПМНЕ, која, според неа, секогаш насочена кон понижување и угнетување на жените, особено на оние кои се гласни и се борат против штетната матрица на оваа партија.
Министерката за финансии, Гордана Димитриеска-Кочоска, денеска ја навреди пратеничката од СДСМ, Славјанка Петровска, велејќи дека нема право да зборува за мајки и семејства, за разлика од неа која е мажена, има семејство и има два сина.
„Пратеничке Славјанка Петровска, не можам да ве кажам почитувана. За да кажам почитувана, треба да ја заслужите мојата почит. Врз основа на што вие ги ставате в уста мајките што имаат деца и како знаете вие едно повеќечлено семејство колку треба да троши? Јас сум мајка на два сина и многу добро знам колку треба да троши едно 4-члено семејство. И научете во пописот што вие го направивте, едно просечно семејство е 3-члено, а не 4-члено. Во однос на грашокот, и јас сакам да купам од конзерва, ама не сум сама, четири члена сме. Мораме да одиме во најевтините маркети и да купиме замрзнат грашок. Тоа беше коментарот, зошто да купуваме грашоци кои се поскапи од 100 денари. Исто беше и за млекото. Некој може троши и по 18 литри, а некој воопшто не пие. Бадемовото вам ќе ви го оставам, вам ви треба, а не мене!“, рече видно нервозна министерката и ја напушти говорницата.
Ј. Ѓ.
