Некои од најпосакуваните туристички дестинации во Европа се соочуваат со прекумерен туризам во последните години. А експертите за патувања идентификувале пет популарни локации кои патниците треба да ги избегнуваат во 2025 година, пишува Express.
Барселона
Тимот на експерти од Фодорс Травел известија: „Барселона моментално има повеќе од 10.000 лиценцирани туристички апартмани на платформи како што е Airbnb, а просечната цена на изнајмување апартман пораснала за 68 проценти во последните десет години.“
Иако градските власти ветиле дека ќе ги укинат сите лиценци за краткорочен наем и ќе се борат против илегалните туристички апартмани до 2028. година, многу жители сметаат дека оваа реакција е премногу задоцнета.
На Reddit, локалците ги споделиле своите размислувања за проблемот со туризмот во Барселона. Еден корисник напишал: „Барселона се претворила во забавен парк за туристи. Сè е премногу скапо. Кога одам на работа или на предавања, морам да избегнувам туристи кои неочекувано застануваат за да направат слики – во било кој момент од денот, неделата или годината.“
Друг додал: „Локалните жители се исфрлени од својот град поради туризмот. Локалните продавници се затвараат затоа што туристичките бизниси се попрофитабилни.“
Историскиот готски кварт е една од најтешко погодените области, бидејќи таму се наоѓа голем број туристички апартмани и атракции.
Маjорка
Овој прекрасен шпански остров е популарна дестинација за Европејци веќе децении, а претходно бил ставен на листата на Фодорс Травел. Летовите од Обединетото Кралство често се достапни за помалку од 50 фунти за повратен билет, порастот на посетителите довел до „невидени гужви“ на некои од најпознатите плажи и градови.
На TripAdvisor, еден посетител напишал: „Плажата Cala Deia е толку пренатрупана што полицијата го регулира сообраќајот на влезот, а цените се астрономски. Морето мириса на канализација. Луѓе, избегнувајте го ова место. Ова не е најдобрата вредност за парите – сè е полно со Инстаграм инфлуенсери. Какво разочарување.“
Владата на Балераите воведе туристички данок во 2016. година, кој дополнително ќе се зголеми во 2025. година во текот на јуни, јули и август. Овој данок важи и за Менорка, Ибиза и Форментера. Покрај тоа, локалните власти воведоа ограничувања во некои од одморалиштата, вклучувајќи забрана за продажба на алкохол во текот на ноќта за да се спречи „прекумерен туризам“.
Канарските Острови
Минатото лето, протести против прекумерниот туризам избувнаа низ цела Европа, со десетици илјади луѓе кои се собраа на плажите на Маjорка и Канарските Острови со банери на кои пишуваше: „Ваш луксуз, наша беда“ и „Канарите имаат свои граници“.
Иако туризмот носи значителни економски придобивки – на Канарските Острови тој учествува со дури 35 проценти од БДП-то и генерира 16,9 милијарди евра во 2023 година – локалното население сè почесто истакнува дека овие приходи не стигнуваат до нив.
Нестор Мареро Родригез, секретар на Здружението на пријатели на природата од Тенерифе, изјавил: „Британските туристи се несомнено најлоши по однесувањето и драматично реагираат кога ќе се соочат со своето однесување и отфрлањето од страна на локалното население.“
Водич од Гран Канарија ја нагласил потребата за одговорен туризам, истакнувајќи дека, иако многу британски туристи се пријателски настроени, значителен дел од нив доаѓаат исклучиво поради сонцето и евтиниот алкохол, што често резултира со проблематично однесување.
Лисабон
Жителите на Лисабон, град во кој бројот на туристички пристигнувања значително се зголемил во последните години, изразиле загриженост дека ќе ја доживеат истата судбина како Венеција.
Со популација од околу 546.000 жители, португалската престолнина секојдневно прима помеѓу 30.000 и 40.000 туристи. Веќе во 2018. година, еден новинар за The Telegraph изјавил: „Во Лисабон и Порто, централните градски области станаа исклучиво туристички зони. На пример, центарот на Лисабон, кој покрива само 1,5 квадратни километри, сега има повеќе од 70 хотели, додека рестораните, сувенирниците и големите меѓународни марки ги истиснаа локалните продавници.“
Фодорс Травел известува дека дури 60 проценти од сместувачките единици во Лисабон сега се наменети за краткорочен наем, што ја намалило понудата на долгосрочни апартмани и значително ги зголемило цените на недвижностите.
Венеција
Италијанскиот град, познат по своите канали, историја и уметност, постојано е преплавен со туристи. Според една неодамнешна студија, Венеција има 21 турист за секој жител. Иако властите воведоа „дневен данок за туристи“ и забранија големите крузер бродови да влегуваат во лагуната, проблемот со прекумерниот туризам останува, а УНЕСКО дури ја стави Венеција на списокот на загрозени градови.
Градот дополнително го зголеми туристичкиот данок воведен во 2024. година – сега тој изнесува 10 евра за патниците кои резервираат помалку од четири дена однапред.
Овие мерки покажуваат дека популарните европски дестинации сè посериозно се справуваат со проблемот на прекумерниот туризам. Ако планирате патување, можеби треба да размислите за помалку посетувани локации кои ќе ви понудат поавтентично и попријатно искуство, пренесува N1 Хрватска.
Б. Т.
