Европската Унија е подготвена да реагира на секоја можна одлука на САД поврзана со царините, за што се подготвува повеќе од една година, порача денеска портпаролот на Европската комисија за економска безбедност, трговија, финансиски услуги и царини Олоф Гил.
– Длабоко жалиме што вчера (САД) воведоа царини за увозот на челик и алуминиум и истото чувство ќе го имаме и за сите идни вакви мерки. Ги повикуваме САД веднаш да ги укинат царините воведени вчера. Сакаме да преговараме за да избегнеме царини во иднина, истакна Гил.
Тој додаде дека царините носат само загуби за двете страни, а ЕУ сака да се фокусира на постигнување „вин-вин“ решенија, бидејќи таа не е дел од проблемот кога станува збор за воведувањето царини на увозот на производи од челик и алуминиум од страна на САД .
– Сугерирањето дека ние сме дел од проблемот е длабоко погрешно. Веруваме дека треба да работиме со САД за да бидеме дел од решението за вистинскиот проблем, а тоа е глобалниот вишок на челик и алуминиум, рече Гил.
Според него, ЕУ се ангажира заедно со европската челична и алуминиумска индустрија за изнаоѓање решенија и надминување на последиците од одлуката на САД, поради која изразува жалење.
