Поранешниот премиер на Велика Британија Борис Џонсон остро ги критикуваше предлозите на американскиот претседател Доналд Трамп за запирање на руската војна во Украина.
Во објава на Икс, Џонсон истакна дека рускиот претседател Владимир Путин продолжува неселективно да убива украински цивили – повеќе од 100 убиени и ранети во Киев, меѓу кои и деца – а во замена за тоа му се нуди право да задржи насилно освоена суверена украинска територија, да ја контролира иднината на Украина преку забрана за нејзино членство во НАТО, да добие укинување на санкциите, економско партнерство со САД и можност повторно да ја изгради армијата за нов напад по неколку години.
„Освен правото да ги споделат своите природни ресурси со САД, Украинците не добиваат ништо“, напиша Џонсон, кој во минатото го поддржуваше Трамп за други теми.
Тој потенцираше дека се неопходни долгорочни, доверливи и добро финансирани безбедносни гаранции за Украина од нејзините западни сојузници.
Putin indiscriminately butchers more Ukrainian civilians, killing and injuring 100 in Kyiv including children. And what is his reward under the latest peace proposals?
1. The right to keep sovereign Ukrainian territory he has taken by violence and in breach of international…
— Boris Johnson (@BorisJohnson) April 24, 2025
„Ако сакаме да спречиме нови злосторства од страна на Путин, мора да понудиме гаранции за безбедноста на Украина – од Велика Британија, САД и сите западни партнери“, заклучи Џонсон.
Вчера Трамп изјави дека, како дел од мировна понуда, Русија наводно се согласила да ја запре војната без да ја освои цела Украина.
