По протестите на хонорарно ангажираните луѓе во тетовската Клиничка болница и ветувањата на централните власти дека ќе добијат вработувања на неопределно време, денес е објавен оглас.
Директорот на Клиничка болница Тетово, Ерсен Ељези денес на прес-конференција информираше дека неговата установа има објавено јавен конкурс за вработување на 119 кадри за медицински персонал, додека за останатите лица од административниот дел ќе биде објавен друг оглас од страна на Агенцијата за администрација.
-Овој чекор има за цел да ги зајакне кадровските капацитети и да ги подобри здравствените услуги за граѓаните. Овој конкурс претставува најголем број на вработувања со трајни одлуки од основањето на клиничката болница во Тетово. Овој конкурс претставува значаен чекор кон унапредување на локалниот здравствен систем и реална можност за професионалците од областа да даваат свој придонес во една важна јавна институција. Сите законски процедури, ќе бидат спроведени од страна административната служба, истакна Ељези.
На новинарско прашање дали ќе бидат законски вработувањата со оглед на наближување на локалните избори, тој одговори дека ќе биде во законски рамки.
-Ние ќе работиме и работиме на тоа и нема да има проблем што се локалните избори. Мислам дека ќе се реализира пред тоа. Конкурс според законот пет дена значи до понеделник. Процедурата е по поднесување на документите, ќе има тест од страна на Министерството за здравство, истакна Ељези.
Министерот за здравство Азир Алиу пред два дена беше на средба со луѓето кои во Клиничка болница Тетово работат со договори на дело. Групата на медицински сестри, техничари, болничари, администрација, како и лекари на крајот на мај и на почеток на јуни одржаа неколку јавни протести со цел да алармираат на потреба да бидат трајно вработени во установата.
