Одржувањето на чистотата на креветот честопати спаѓа во споредни работи во домот, иако неговата ткаенина и сунѓер лесно ги апсорбира мирисите. Во лето, деновите се подолги, температурите се повисоки, па и мирисите околу нас стануваат поинтензивни… Не е изненадување што и живеалиштето добива поинаков изглед, пишува порталот „Вечерњи“ (Večernji).
Креветите се изложени на телесни мириси, истурена храна, домашни миленици и надворешна нечистотија што се насобира секој ден. Освежувачите на воздух само ги маскираат миризбите. Спојот од пот, влажност и затворен простор без доволна вентилација, честопати резултира со специфичен, понекогаш непријатен мирис којшто не е присутен во другиот дел од годината. Чистењето на каучот, во таа смисла, честопати се занемарува, па ткаенината лесно може да ја впие миризбата и таа да остане трајна. Теписите, исто така, собираат миризби, па затоа се препорачува темелно чистење барем еднаш месечно.
Ерин од блогот „Чисто и миризливо“ (Clean and Scentsible), споделува дека ослободувањето од непријатните миризби на кауч или тепих – е многу лесно, бидејќи сè што треба е малку сода-бикарбона и есенцијално масло.
– Сода-бикарбоната е одличен впивач на миризби, а есенцијалното масло ќе остави пријатен мирис. Таа е природен „дезодоранс“ бидејќи ги впива сите ужасни мириси, наместо само да ги покрива како што би направил освежувач на воздух. Сода-бикарбоната е позната и по тоа што ги разградува телесните масла, влагата или нечистотијата залепени на ткаенината, што го олеснува чистењето, објасни таа.
Рецептот
Ќе Ви требаат: 120 грама сода-бикарбона, 10 до 25 капки од Вашето омилено есенцијално масло, малку топла вода и херметички затворен сад. Есенцијалните масла се користат за Вашиот дом да мириса убаво, но важно е да се напомене дека некои масла може да бидат отровни за домашните миленици, па затоа се препорачува внимателност пред користење.
За почеток, се додадева сода-бикарбона и малку топла вода во садот, а потоа следи и есенцијалното масло. Треба само мала количина вода, за да направите густа смеса, којашто се меша што е можно порамномерно за да остане цврста и да не се разлева.
Се нанесува тенок слој на тепихот или каучот, и се остава така 30 минути. Ова ѝ дава доволно време на содата да ги отстрани сите миризби, но и нечистотии во ткаенината.
По половина час, користете го додатокот со четка на правосмукалка и просто – вшмукајте ја целата смеса од сода-бикарбона. Вашиот дом потоа треба да мириса многу почисто и посвежо, особено теписите и креветите.
