Најмалку 20 лица, вклучувајќи две деца, загинаа во руски ракетен напад врз градот Тернопил во западна Украина ноќта меѓу вторник и среда, соопшти украинската Државна служба за вонредни ситуации, пренесува Euronews.
Повеќе од 66 лица се повредени, меѓу нив 16 деца, а спасувачките екипи и попладнево работат на расчистување на урнатините, бидејќи дел од станарите сè уште се заробени под бетонските плочи.
Два стамбени блока погодени
Според службите, погодени се две деветкатни згради – едната е опожарена, додека другата е уништена од третиот до деветтиот кат.
На местото на ударот, густ чад и остатоци од фасади се распрснати низ соседството.
Украинската премиерка Јулија Свириденко изјави дека нападот бил насочен кон „цивилното население, а не кон воени цели“, нагласувајќи дека целите биле „станови и места каде луѓето го поминуваат секојдневието“.
Напад со комбиниран тип ракети
Портпаролот на украинските Воздушни сили, Јуриј Игњат, соопшти дека, според првичните информации, станбените блокови биле погодени од руски крстосувачки ракети Х-101.
Тој додаде дека западот на Украина бил погоден со комбиниран ракетен напад, во кој биле користени Х-101, ракети „Калибр“ и најмалку една балистичка ракета.
Украина се соочува со засилени воздушни напади
Русија последниве месеци значително ги засили ракетните и дрон-напади врз украинската инфраструктура и цивилни цели.
Во многу градови, граѓаните поминуваат над 15 часа дневно без електрична енергија, додека температурите паѓаат со приближувањето на зимата.
