Студените зимски утра често значат минусни температури, замрзнати стакла и неколку дополнителни минути пред поаѓање на работа. Многумина уште од рано утро ќе мора да го чистат мразот од ветробранското стакло, но постојат неколку едноставни трикови што можат значително да ја олеснат оваа рутина.
Видео што неодамна се појави на TikTok предизвика големо внимание, откако корисничка по име Лизи покажа како правилно се користи стругалката за мраз. Таа објаснува дека едната страна од стругалката е наменета за грубо кршење на мразот, додека другата служи за брзо и рамномерно чистење на стаклото. Откако ја демонстрираше техниката, многумина во коментарите признаа дека со години возат, а никогаш не знаеле дека стругалката има двојна функција.
@10elizabeth49
Покрај ова, корисници во коментари потсетија дека најпрактично е автомобилот да се запали додека се чистат стаклата, за грејачот и одмаглувањето побрзо да ја подобрат видливоста и возилото да биде подготвено за поаѓање.
Дополнителен корисен совет е подготовката на домашен спреј за одледување. Во шише со распрскувач може да се измеша еден литар алкохол, мал дел вода и неколку капки детергент за садови, или алкохол и вода во однос две спрема еден. Оваа мешавина го омекнува мразот и овозможува побрзо чистење на стаклата без долготрајно стружење.
За полесно отворање на вратите и заштита на бравите од замрзнување, може да се користи средство како WD-40, а за превенција помага и нанесување глицерин, вазелин или малку масло на гумените заптивки. И начинот на паркирање игра улога – доколку возилото е свртено кон исток и не е закриено од згради, утринските сончеви зраци побрзо ќе го стопат мразот на стаклата.
Како едноставна, но ефикасна заштита, преку ноќ на ветробранското стакло може да се стави картон или стар пешкир, со што се спречува директното замрзнување. За да не се залепат бришачите, тие може да се подигнат или да се заштитат со стари чорапи, додека надворешните ретровизори лесно се чуваат од мраз со обични пластични кеси прицврстени со ластик.
Извори:
Информациите во текстот се преземени и адаптирани од објави и видеосодржини на платформата TikTok, како и од медиумските написи објавени од 24sata.hr, Mirror, и тематски рубрики за автомобили и зимско одржување на возила во регионални и британски медиуми.
Редакција Фронтлајн
